Computer Software hmanga ram leh hmunhma chhinchhiahna Serchhip District-ah kalpui a ni dawn

Computerization of Registration, National Generic Document Registration System (NGDRS) chu Serchhip District-a kalpui turin nimin khan Revenue Department changtu Minister Lalruatkima chuan a hawng a, he ruahmanna hnuaiah hian mipui ten ram an neih te Computer Software hmangin chhinchhiaha vawnthat a ni dawn a ni.

Computerization of Registration, National Generic Documentation Registration System (NGDRS) hawnna puala inkhawm Serchhip DC Conference Hall-a nimin-a neih ah Revenue Minister Lalruatkima chuan NGDRS hi Mizoram-ah kalpui tura hawn a lo nih tawh thu leh Aizawl District-ah Computerization of Registration hi kalpui ni tawhin Mizoram-a a pahnihna ni tura Serchhip District-a hawn a ni leh ta chu lawmawm a tih thu sawiin, Serchhip District mipuite chu an vannei hle tih a sawi a. In hmun leh ram sawrkar-a chhinchiah leh chutiang lam kaihhnawih thil tinrengte awlsam zawkin mipuiten kan tithei tawh dawn tih sawiin, kan hmunhma lehkha pawimawhte Computer hmanga vawn vek an ni tawh dawn avangin In hmun lei leh hralh thu ah te, document bo thu ah te thlengin he hmalakna hian nasa takin min tiphuisui dawn a ni, a ti. In hmun lo ram teh leh lehkha pawimawh thuah an Department in dem a hlawh chang a awm thin tih sawiin Revenue Minister chuan, “Heng mi thenkhat ten min han dem deuhna te pawh hi han chhui chian chuan a neitute fimkhur tawk loh vang leh chet fel tawk loh vang a lo ni fo zawk a. Chuvang chuan mitinin kan In hmun leh ram Pass thil te uluk taka vawng thaa, ramri chhinchhiahna te pawh fel taka siam thin a tul hle a ni,” a ti a. Fel tak leh tha taka kan hmunhma te kan enkawl hian buai theihna tam tak kan pumpelh bakah thawktute pawh nasa takin min pui tihna a ni, a ti bawk.

SEDP chungchang pawh sawiin Lalruatkima chuan, Flagship Programme an neih chu hri leng avangin kum 2 chhung kalpui mumal theih a nih loh hnuah kumthar ah chuan mipui hnen thleng thei turin ruahmanna an neih thu a sawi a. SEDP chu sum leh pai dawnthleng ah ringawt kan ngai a nih chuan engtik ah mah hma kan sawn loh tur thu leh kan dinchhuah loh tur thu sawiin, “Sawrkar min tanpuina hi a hming chauh a ni a, theihtawp chhuahin hma kan lak a ngai a ni,” tiin hmalak zui a tul thu a sawi a. Serchhip District chu buh leh thlai chinna kawngah pottential nei tha a nih thu sawiin, hetiang hi a dinhmun a nih avangin a chhawr tangkai hmasa kan nih theih nan sawrkar in ruahmanna a siam thu a sawi bawk.

Land Revenue & Settlement Department-a Director leh Inspector General of Registration Angela Zothanpuii kaihhruai he hunah hian Serchhip District Bawrhsap leh District Registrar Kumar Abhishek chuan India ram hmun danga hmunhma Pass an enkawl dan leh chhinchhiah dan enin Mizoram pawhin he hmalakna hi a mamawh hle tawh nia a lan thu a sawi a. He hmalakna hian mipuite leh Revenue Department-a thawktute tan awlsamna nasa tak min thlen dawn bakah ramri thu-a buaina leh lehkha pawimawh bo thu-a buaina te thlengin a titlem thei dawn a ni, a ti bawk.

He hunah hian Asst. IGR B. Hmangaih-kima chuan Technical Report pe in Computerization of Land Registration chu sawrkar laipui hmalakna a nih thu leh a Software te pawh ‘One Nation One Software’ tura duan a ni tih a sawi a, India ramah he software hmang thei hmasa 6-na leh NE States zingah 2-na kan nih thu a sawi a. He hmalakna hi ram chhinchhiah mai bakah Registration Fee leh Stamp duty thlengin kan tangkai pui hle dawn a ni, a ti.

NGDRS hnuaiah hian Serchhip-ah hian Sub-Registrar hawn niin Minister hian a tlawh nghal a, hnathawk tur te bakah hmanrua tur dahin Training pek vek an ni tawh a, Common Service Centre (CSC) kaltlanga dawr tur niin Online Document Registration ti tur tan https://igrmizoram.nic.in-ah dawr tur a ni ang.