Hri kai 398 hmuh belhin enkawlai sang li aiin tlem

Mizoram-ah ni khat-a COVID-19 hri kai hmuhchhuah zat a la tlahniam hret hret a, niminpiah khan Sample 3726 enfiah atangin hri kai mi 398 hmuh niin Sample enfiah atanga za zela 10.70 te chuan hri an kai a, nimin tlai ah khan hri kai enkawllai chu mi sang li aiin an tlem tawh zawk a ni.

Niminpiah khan ZMC-a RT-PCR Laboratory-ah Sample 327 enfiah niin heng atang hian hri kai mi mi 50 hmuhchhuah niin an vai hian Aizawl District-a Sample lak vek an ni a, Veng leh khua 20 ami te niin Veng mal a hri kai hmuhchhuah tam lutuk an awmlo a ni. Fluorescent Immunoassay Test hmang hian niminpiah khan Aizawl-ah Sample 22 enfiah ni bawkin hri kai mi 3 hmuh an ni a, Aizawl khawpui chhung ami an ni.

Saiha leh Lawngtlai tihloh District dang zawnga TrueNat Laboratory atangin niminpiah khan Sample 307 enfiah niin hri kai mi 66 lai hmuh an ni a, an zinga 37 te chu Lunglei District atanga hri kai hmuh te niin Champhai District-ah 10, Kolasib District-ah 6, Serchhip leh Hnahthial District-ah 5 ve ve, Khawzawl District-ah 2 leh Aizawl District-ah pakhat te an ni.

Rapid Antigen Test hmanga Sample enfiah 3070 atangin hri kai mi 279 hmuh an ni bawk a, an zinga 122 te chu Aizawl District-a hri kai hmuh te niin Champhai District-ah 38, Serchhip District-ah 28, Mamit District atangin 24, Lunglei District atangin 22, Saitual District atangin 14, Hnahthial District atangin 11, Lawngtlai District atangin 7 leh Kolasib leh Khawzawl District atangin 6 ve ve leh Siaha District atangin mi pakhat te an ni.

Nimin khan Mizoram-ah tlai dar 5:00 thlengin hri kai enkawl dam mi 474 an awm belh leh a, heti hian nimin tlai dar 5:00 thlenga Mi-zoram-a hri kai hmuhchhuah tawh chu 1,33,113 niin an zinga 1,28,666 te chu enkawl dam an ni tawh a, hei hi hri kai hmuhchhuah atanga chhutin za zela 96.66 enkawl dam tawh ang a ni a, hri kai enkawllai 3966 an la awm a ni. Mizoram-a hri kai zingah nimin khan mi pahnih boral awm belh lehin Mizoram-a hri kai zingah mi 486 an boral tawh a ni.