Art & Culture Minister in Serchhip Kawlri tlang-a Chawngpuii Khawthlir a hawng

Serchhip Heritage Society in Serchhip Kawlri tlang-a ‘Chawngpuii Khawthlir’ an sak chu nimin khan Art & Culture Minister R. Lalzirliana chuan a hawng.

Art & Culture Heritage Conservation Grant in Aid sum cheng nuai 8.22 senga sak ‘Chawngpuii Khawthlir’ hawnna puala inkhawm Kawlri tlang-a Pastor Chhawna Tawngtaina In tual-a buatsaih ah Art & Culture Minister chuan Mizoten lal ropui tak tak tam tak kan nei tawh a, nimahsela chung lal ropui tak takte chuan hriatreng leh chawimawi an hlawh vek lem lo tih a sawi a. Serchhip erawh chuan tun hmaa in hmunhmate lo awp tawhtute hriatrenga chawimawina chang an hria te, an hmunhma vawnhim duhna thinlung an neite, Heritage Society hialte an din chu entawntlak a tih thu a sawi a. Pipu hmun hluite vawntthata humhalh leh nan tlai luat a awm loh thu leh, tun hi hun tha a ni reng zawk tih a sawi a, “History te hi tun hnua han hriatfiah zawk takte pawh a awm thei zel a, thil chiang zawk hre tura beih zel kha kan tihtur pawimawh a ni a, an nungchang duhawm tak takte pawh kha i zir nawn leh ang u,” a ti. Minister hian hnam inpumkhatna leh in unaunate pawh kan tobul hriatna in nasa takin a tanpui thei a, Zo hnahthlak tawng chi hrang hrang, inzul tak tak si engemawzat awmte hian hnam ropui leh darhzau tak kan nihzia a tifiah hle-a a hriat thu a sawi bawk.

Chawngpuii Khawthlir hawnna inkhawm hi Serchhip Heritage Society-a Chairman Lalrinthuama Kawlni chuan kaihruaiin khual zahawm Adviser to Chief Minister C. Lalramzauva pawhin Chawngpuii Khawthlir sak a nih theih nana hma lak saktu Minister R. Lalzirliana chungah lawmthu sawiin, Serchhip Heritage Society te hmalakna chu fakawm a tih thu a sawi bawk. He hunah hian Art & Culture Department-a Deputy Director K. Lalruala pawhin Serchhip-in pi leh pute hmun hlui vawng thatu pawl chak leh bengvar tak an nei chu lawmawm a tih thu a sawi bawk. Nimin-a he hun hmanna ah hian Serchhip Heritage Society-a Asst. Secretary Kaptluanga Ralte chuan report pe in Secretary K. Remruatfela chuan Serchhip History tlangpui a sawi bawk.

Serchhip lal hmasa bera ngaih chu Lalrumi niin kum 1856-ah Serchhip-ah a lal tawh nia hriat a ni a, a thlahte pawh Vawiin thlengin Serchhip-ah an la awm a. Lalrumi pasal hi Sailianpuia, lal ropui Suakpuilala fapa niin Sailianpuia farnu hi Chawngpuii, nula hmeltha tak a ni a. Nimahsela pasal a neih hnu rei vak lovah raichehin Chawngpuii hi thiin Chawngpuii ngaia lungleng taka an len thinna tlang chhip hi ‘Chawngpuii nu Lunglen tlang’ tia phuah zui a ni ta a. He hmunah hian Khawthlirna (View Tower) hi sak a ni a, helai hmun atang hian Serchhip bakah Mizoram hmun zau tak thlir theih a ni.