Mizoram-ah politics kalphung thar chhuakin mi chi hnih kan awm ta - K. Sapdanga

ZPM Working President K. Sapdanga chuan Mizoram-ah politics kalphung thar chhuakin mipuite zingah mi chi hnih kan awm ta tih a sawi.

Serlui Constituency-a Serlui East Block hawnna leh mi thar lawmluhna hun nimin-a Saipum Community Hall-a neih ah ZPM Working President chuan Mizoram-ah politics kalphung thar chhuakin Mizoram mipuite zingah mi chi hnih kan awm ta tih hi a sawi a, “A chi khatna chuan ram rorelna tha din tur hian thianghlim taka beih an duh a, chung mite chuan ZPM hi an bel a, Pathian hriatpui tlâka campaign an duh a ni. A chi dang leh chuan Mizoram hi siamthat theih a ni lo tiin Zu nen, ruihhlo nen inbumna hmanga campaign pawh an hreh lo a, chung mite chuan party dang an bel a, a then chu an ruling mek a ni,” a ti a. “Keini party pawh hi a hma chuan party hrang hrangah kan awm a, tunah erawh chuan Zoram thar siam tûrin theihtawpin kan tangrual ta a ni,” a ti.

ZPM Working President chuan Hnam Party meuh a inchhal te sawrkarna hnuaia Contract hnaa induhsakna thil avanga Hnam tana thil pawi leh Hnam pawikhawih thil thleng a awm ta mai chu a pawi takzet tih pawh sawiin, “Mizote rilru a tina a, an kaihhruaina hnuaiah hian kan ram leh hnam hi a him lo a ni. Zirlai pawlte hmalakna ZPM chuan a thlawp tlat a. ZPM sawrkarna hnuaiah chuan hetiang thil a thlen hi kan phal ngai dawn lo a ni,” a ti bawk.

He hunah hian ZPM Leader Lalduhoma pawhin Mizoram khaw lian leh khaw te a mipui titi ber chu ‘2023-ah chuan ZPM an sawrkar tawh dawn’ tih a ni tih sawiin, “Kan ram dinhmun kan hria a, Congress party hi party ropui tak leh tha tak a ni a, hun rei tak chhung ro pawh an rêl a ni. Thil tha leh chhuanawm tak tak pawh min hnutchhiah a. Amaherawhchu, tûnah chuan Congress hun hi Central-ah leh Mizoram ngeiah pawh a her liam mek a ni. ZPM hun a in her mek a, Congress unaute in finna leh theihna te, remhriatna te kan mamawh a, ZPM-ah in tân kawngka zau takin an in hawng a ni,” a ti a. “MNF te pawh ram leh hnam tan a theihtawp a bei an ni a, Amaherawhchu, pâwl pawh hi hruaitu a dik loh chuan thil a fel thin lova, tuna MNF hruaitute hi mipuiten rin zêl tlakah an ngai tawh lova, chuvang chuan MNF unaute pawh he kalphung thar ZPM ah hian ram leh hnam tana ke pen zel tûrin kan sâwm che u a ni,” a ti bawk.

Tunhnaiah Sakawrhmuituai tlang Skywalk Project leh Durtlang-Chaltlang Ropeway hna pamtul chhanah Congress leh MNF te an inpuh tawn mek tih pawh Lalduhoma chuan sawiin, “Pathian leh mipui zarah ZPM kan sawrkar ve hunah chuan hetiang thil hi a thlen kan phal dawn lova, a lo thleng palh a nih pawhin a chhan zawng chhuakin leh hrem ngai te hrem turin hma kan la nghal zel dawn a ni,” a ti bawk.