Serchhip District-a COVID-19 Vaccine la zingah Vaccine la duhlo mi 2218 an awm

Serchhip District-a COVID-19 Vaccine la thei kum 18 chunglam te chu Vaccine Dose 1-na pek kim thawkhat an ni tawh a, Serchhip District pumah COVID-19 Vaccine la duhlo mi 2218 zet an awm thung.

Serchhip CMO Office atanga thu kan dawn danin kumin January thla atang khan Serchhip District-ah hian COVID-19 Vaccine pek hna hi kalpui niin hemi atang hian chawl lovin hmalak chhunzawm zel a ni a. Electoral Roll atanga a lan danin Serchhip District-ah hian kum 18 chunglam, Vaccine la thei mi 47,731 awm anga chhinchhiah niin heng zinga 42,243 te chuan Vaccine Dose 1-na la tawhin an zinga 37,546 te chuan Dose 2-na an la tawh bawk a. Vaccine la thei atanga chhutin za zela 88.50 ten Vaccine Dose 1-na la tawhin Vaccine Dose 1-na la tawh atanga chhutin za zela 88.88 te chuan Dose 2-na an la tawh bawk a ni.

Serchhip CMO Office a thawktute chuan natna leh thildang avanga vaccine pekna hmun pan theilo te vaccine pek hna kalpuina ah hetiang mi in report te vaccine pek an nih tawh thu leh mi 28 te Dose 1-na pe tawhin mi 13 te Dose 2-na pek an nih tawh thu an sawi a. Hei bakah hian sawrkar laipui ruahmanna anga Vaccine la lo te an chenna In-a tlawhchhuaka vaccine pek hna kalpuina, 'Har Ghar Dastak' hnuaiah Serchhip District-a chenna In te tlawhchhuah thawkhat a ni tawh bawk tih an sawi a, hetah hian mi 262 te hnenah Vaccine Dose 1-na pein mi 451 te hnenah Dose 2-na pek an nih thu an sawi bawk a, Dose 1-na aia Dose 2-na pek an tam chhan hi Vaccination Side-a Dose 1-na la, Dose 2-na la duh lo te pawh tlawhchhuaka vaccine an pek leh vang a ni tih an sawi a. District chhung khaw thenkhat atanga report la lut lo tlem a awm avangin vaccine la hi an la pung leh hlek tura an ngaih thu sawiin, tunah chuan vaccine la thei leh la duh chu la kim tawh thawkhat ah an in ngaih thu an sawi bawk.

CMO Office-a thawktute chuan Serchhip District chhungah Sakhaw rindan avang leh chhan dang avanga COVID-19 Vaccine la duhlo mi 2218 an awm thu sawiin, heng te pawh hi an chenna In ah tlawhchhuak vek an nih tawh thu an sawi a, kumin chhunga kum 18 tling chin turte chu Vaccine hi pek nghal an nih thu pawh sawiin, Vaccine eng Dose pawh la thei zingah la la lo te tan Nilaini leh Zirtawpni apiangin lak theih reng a nih thu an sawi bawk a ni.