Bairabi - Sairang Rel kawng siam turah hnathawh tur lian zingah 65% zawh a ni tawh

North East Frontier Railway (NFR) hotute chuan nimin khan Mizoram Governor Dr. Hari Babu Kambhampati chu Raj Bhavan-ah hmuin Bairabi leh Sairang inkar Rel kawng KM 51.38-a thui siam mek chungchang an sawiho a, he hunah hian hnathawh tur lian tham deuh chu zaa 65 (65%) zawh a ni tawh tih tarlan a ni.

He sawihona hunah hian Governor Hari Babu Kambhampati chuan Mizoram in project pawimawh tak pahnih KMMTTP leh Rel Kawng siam hna a nei tih sawiin, a pahnih hian a vei hle a, Mizoram State tana nasa taka hmasawnna thlentu a nih ngei dawn avangin siam zawh thuai a nghakhlel hle tih a sawi a. Rel kawng siamtute chu Working Season hun tawite chhungin theihtawp chhuah turin a chah a, an harsatna neih ang te Central sawrkar dawr ngai chi leh State sawrkar anga tihfel theih chinah pawh theihtawp chhuahpui a lo tiam a ni.

He Rel kawng siam hna hi ‘National Project’ atan 2008-09 khan puan a lo ni tawh a, Nov. 29, 2014 khan India Prime Minister Narendra Modi chuan he Project bultanna lungphum a phum a ni. Mizoram leilung in a zir loh vang te, hnathawh hun chhung a rei loh vang te leh harsatna thleng dang avangin he project zawh hun tura chhut chu tih danglam a ni zeuh zeuh tawh a. Tuna chhut dan thar berah chuan March 2024 khian he project hi zawh fel hman beisei a ni.

NFR Official te sawi danin he Project-ah hian hnathawh tur lian tham deuh chu zaa 65 (65%) zawh a ni tawh a, hna lian tham deuh te chu- 375 lakh cubic metre of Earthwork te, Lei lian 55 dawh tur te, Lei tenau 87 dawh tur te, Leiverh meter 12653-a thui siam leh Rel Station 4 siam te a ni. NFR Official te chuan he Project pawimawh tak hi siam zawh thuai a nih theih nan State sawrkar pawhin theihtawp a chhuah pui a, khawtual mi te pawh hnathawh tibuai zawngin an khawsa lo tih sawiin, lawmawm an tih thu an sawi a. Amah-erawhchu, compensation phut a Court a kal an awm deuh reng avang erawh chuan harsatna an tawh thu an sawi a. Ram neitu nihna inhlan-chhawn pawh a la fel hlei thei lo a, tihfel thuai a nih theih nan Governor \anpuina an dil a. Rel Station panna kawng State sawrkarin a siam ve tur pawh siam thuai a nih theih nana hmalakpui turin an ngen bawk a ni.