Serchhip P&E Veng in Boxer Vanlalringa lo hmuak

Serchhip atanga Professional Boxer hmasa ber Vanlalringa chuan a inhnek hmasak bera hnehna a chan hnuah nimin khan Serchhip rawn thlengin khawtlang huapa lo hmuah a ni.

Serchhip P&E Veng tlangval Vanlalringa S/o Sawithuama hian Grassroot Boxing Promotions, Kolkatta atanga sawmna a dawn hnuah Pathianni zan khan West Bengal Boxer Vikas chu Featherweight-ah hma-chhawnin Bengalore-ah Unanimous decision in a hneh a, Vanlalringa hi Grassroot Boxing Promotions ten kum 3 chhung daih contract ziahpui nghalin hemi chhung hian a inhnek tur hrang hrang an ngaihtuah sak nghal dawn bawk a ni.

Boxer Vanlalringa hi P&E Veng Village Council huaihawtin P&E Veng-a Mini Park-ah lo hmuah niin MHIP P&E Veng Branch ten Thangchhuah kawr leh Thangchhuah Diar te an hlan hnuah amah lawmna Inkhawm chu P&E VC Vice President F. Lalhmangaiha kaihhruai in neih chhunzawm a ni a, he hunah hian P&E Veng Branch MUP President C. Lalbiakthanga, P&E Veng Branch YMA President C. Lal-hmangaihzuala, P&E Veng Sporting Club President Lalrinfela leh Serchhip District Boxing Association President Kapliana Pachuau bakah P&E Veng VCP C. Vanlalsiamthara ten lawm-puina thu an sawi a, Boxer Vanlalringa hian Professional Boxer ni tura a inbuatsaihna leh tun tuma an zuk in hnek dawn te a sawi bawk a ni. Nimin a Boxer Vanlalringa hmuahna ah hian pawl hrang hrang leh mimal te lawmpuina leh duh-sakna thilpek an hlan bawk a ni.