Latest News

DAN ANGA FA LAK (LEGAL ADOPTION)

DAN ANGA FA LAK (LEGAL ADOPTION)

- Liansangpuii

Protection Officer (Non-Institutional Care)

 District Child Protection Unit, Serchhip

Naupang chu amah hringtu a nu leh pate’n an thihsanin emaw, an thlahthlamin emaw, an enkawl theih lova midang lak theih tura an pe (surrender) emaw anih chuan midangin Dan hmangin fa atan an la thei a, hei hi Legal Adoption kan tih chu a ni. Dan chuan Adoption chu fahrah, hlamchhiah leh surrendered naupang ten an dikna leh chanvo chhungkua ah an chan ve ngei theihna hmanrua atan hmantur a ti a. Adoption-in a tum bulpui ber chu heng naupangte hian Dan hmanga kumkhuaa an chhungkaw nghet tur zawnsak hi a ni. Hei hian naupang leh a adopt-tute inkarah inlaichinna nghet, dikna chanvo, hamthatna leh mawhphurhna, fahrin ten an chan ang zawng zawng a keng tel a ni. He Dan hnuaia Adoption tih chu naupang leh a adopt-tute tan a him em em a, tuma sawibuai theih a ni lo.

Dan kan tih hian naupang pual bil dan, Juvenile Justice (Care and Protection of Children) Act kan sawina a ni a, JJ Act tia sawi mai thin a ni. He dan hian Adoption tih dan tur hi mumal takin a duang a, fa adopt tur hian tehna hrang hrang a awm a, uluk taka zirchianna neih hmasak phawt thin a nih bakah naupang pawh adopt a nih theih nan tihfel tur chi hrang hrang a awm bawk. JJ Act 2015 hman anih hnuah Adoption inkaihhruaina pawh hi Govt.of India in siamtha ve in Adoption Regulations, 2017 tih a ni a, hei hi 16th January 2017 atang khan kan hmang tan a, Guidelines 2015 thlakin a aia khauh zawk leh thunei zawk a ni. Regulations 2017-ah hian thil thar Relative Adoption leh Step Parent Adoption te belh niin online lamah hman theih a ni tawh bawk.

Relative Adoption hi keini Mizote tan hian a tangkai em em a, mahni chhungkhat laina hnai, a hma atanga lo enkawl leh lo chenpui tawh te tan pawh Dan ang thlapin Adoption a tih theih ta a ni. Relative adoption ti tura inlaichinna erawh chu Dan hian bithliah a nei a, naupang pi leh pu (a nu nu leh pa/a pa nu leh pa) emaw, naupang nu unaute leh naupang pa unaute hian Dan ang thlapin Relative adoption hi an ti thei a ni. He Dan siam anih atanga vawiin thleng hian Serchhip District bikah relative adoption tihfel tawh mi panga(5) awmin, Court order nghah mek pakhat (1) a awm bawk. Relative adoption ti tur hian Adoption tih dan pangngai anga kum bithliah a awm ve lova, kan sawi tak anga inlaichinna nei an nih phawt chuan, documents dik tak nen dan angin online in awlsam takin a tih theih reng a ni.

Mizoram-ah JJ Act hnuaia adoption hi kum 2005 atang khan mumal taka kalpui niin, kum 2005 atanga September, 2021 thlenga naupang adoption a pekchhuah tawh zawng zawng chu Ramchhung (In-Country) ah 312 leh Rampawn (Inter-Country) ah 57, an vaiin 369 a ni a. August ni 1, 2015 atang khan India ram chhung leh pawn atanga India naupang adopt zawng zawng chu online system hmang veka tih ngai a ni tawh a. Mi tupawh naupang adopt duhte chuan mahni awmhmun atangin awlsam takin online registration tiin naupang adopt duhna State kha thlan theih a ni. Seniority list hmun khatah India ram puma naupang adopt duhte chu awmin a senior dan indawta naupang pek thin an ni. Hei vang hian Mizoram naupangte pawh State chhung mai nilo, State dang leh India ram pawn thlengin mi tupawh Dan-in nau adopt thei tehna a siamah a tlin chuan an adopt thei tihna a ni.

Dan anga Fa lak (Legal Adoption) hi Mizote zingah fa neilo te chauhin an tih tur ni a ngaihna a awm thin, hei hi a that viau rualin mi tupawh mahni fahrin pathum aia tlem nei emaw, nupui/pasal neilo, tehna danga tling apiang te tan fa lak hi a theih a, mipa nupui neilo tan erawh hmeichhe naupang lak phal a nilo thung. Kan sawi tak naupang chhungkaw neilo tana chhungkaw zawnsak hi a tum ber anih avangin intihhmuh ila, kan Sakhuana nen pawh hian a inhmeh em em a ni. Tin, naupang kan thlan danah pawh hian nau hrisel leh piantha te chauh thlang lo hian, rilru leh taksa lama harsatna nei naupangte pawh hi hmangaih taka enkawltu chhungkua mamawh hlei hlei an ni tih hria in, an tan tha leh zung sen inhuam ila, hma kan sawnna zel tur a ni awm e.

The Juvenile Justice (Care and Protection of Chidren) Act, 2015 a section 80 in a sawi angin mimal emaw pawl emaw in he Dan hnuaia inkaihhruaina duan ang ni lova fahrah (orphan) emaw, hlamchhiah (abandoned) emaw, fa atana pek (surrendered child) emaw, an lo zuar (offer) emaw, pe (give) emaw, la (receive) emaw a nih chuan chutiang titu chu kum thum (3) thleng tantir emaw, cheng nuai khat thleng chawitir emaw, a pahnih emaw a hrem kawp theih a ni.

Khawtlang ah hma kan sawna, hemi rual hian fa lak chung changa kan rilru put dan ah pawh hian hmasawn ve zel ila, miin hmangaih taka an fa atana an thlan Dan hmanga an lak naupangte chungchang thudik tawklo leh fa lak anni tih te lo va sawisak chhen hi thil tullo, kan tih loh tawp tur a ni. Naupang hi an duhthlan reng vang ni lovin khawvelah an lo piang a, an nu leh pa te khawloh vang emaw, vanduai vang emaw a thisen zawmpui hauhtu/enkawltu dang an neilo anih pawhin, nu leh pa, chhungkua nei lovin an awm tur a ni lo. Naupang dang ang bawk a nu leh pa, chhungkaw neih hi danin an dikna chanvo a pek a ni. Naupang pakhat fa atana ilo lak (Adopt) avang khan khawvel a danglamlo a ni thei, mahse chu naupang tan chuan a khawvel zawng zawng a danglam vek thung dawn a ni tih hria in a thei leh tlin apiang te chuan Adoption hi intihmuh ila, uar sauh sauh ang u.

Adoption ti tura in register duh harsatna nei emaw, a kalphung hrechiang duh hrim hrim te chu Specialized Adoption Agency, District Child Protection Unit, State Adoption Resource Agency Office-ah te puih thin niin pan theih reng an ni. Tin, online hmanga en duh tan cara.nic.in ah englaipawhin en theih reng a ni bawk.

Dan anga fa lak(Legal Adoption) hi hmangaihna atanga chhuak, a kawng erawh Dan hmanga hlenchhuah ngai a ni.

Comments

Popular News (Last 30 Days)