Fimkhurna Hapta hmang tan

Zoram Drivers’ Union (ZDU) chuan nimin atang khan Mizoram-ah Fimkhurna Hapta, ‘Drivers' Week’ an hmang leh tan a, thla thar Dec. 3 thleng khian hman a ni ang.

Serchhip-ah chuan Fimkhurna Hapta hawnna hi nimin zing khan Serchhip Bazar Tual-ah neih niin ZDU Sub-Hqrs. Serchhip President S. Lalpianga chuan a kaihruai a, he hun hmanpuitu Serchhip District Transport Officer C. Lalawmpuia chuan hri leng karah pawh ZDU ten Fimkhurna Hapta an hmang thei chu lawmawm a tih thu sawiin, Serchhip-a lirthei khalhtute chu an felfai tlangpui nia a hriat thu a sawi a. Kumin a Krismas leh Kumthar vuakvet-ah pawh fimkhurna, hawihhawmna leh zawldawhna nen lirthei khalh tura chahin, sawrkar in lirthei neitute leh khalhtute tana Dan a siam pawimawh thenkhat te a tarlang bawk.

Kumin a Fimkhurna Hapta hman ah hian kumdang-a Car Flag zawrh thin ang kha zawrh a nih dawn loh bakah Programme dang siam a ni dawnlo bawk a, amaherawh chu Serchhip khawpui chhung hmun lunlai-ah he Hapta hman mek pual hian Banner te tarin ZDU chuan lirthei khalhtute chu an lirthei khalh kawng hrang hrang ah fimkhur turin an chah bawk a ni.

ZDU Sub-Hqrs. Serchhip hi kum 1975 khan din niin tunah hian member 518 aan awm mek a ni.