Nikum aiin kumin ah Malaria vei tlahniam

Mizoram-ah nikum (2020) aiin kumin (2021)-ah January atanga October thla chhunga Malaria vei zat chu za zela 46.9% laiin a tlahniam.

State Vector Borne Disease Control Programme (SVBDCP) hmalakna kal zelah, Malaria test runpui chu Mizoram-a Malaria tam zualna District pathum- Lunglei, Lawngtlai leh Mamit-ah te kalpui chhunzawm zel a ni a. He test runpui neih chhunga mi endik tawh zawng zawng zat chu mi 54,085 niin heng atanga Malaria vei hmuchhuah tawh chu mi 906 an ni a, PF 798 leh PV 107 bakah Mixed Infection (PF leh PV vei kawp) mi pakhat te an ni a, Malaria vei hmuhchhuah zawng zawng te hi a thlawn vekin Malaria damdawi te pek nghal zel an ni bawk. He hmalakna Mass Screening & Treatment (MSAT) hi November ni 8 atanga ni 20 chhunga neih niin Psitivity Rate chu 1.90 a ni. He hmalakna hi Malaria case a tlakhniam mek laia case pung zel tur tih chimit tuma beihpui thlakna ni bawkin tun thla chhung kalpui chhunzawm tura ruahman a ni a, Khawsik nachhan hi COVID-19 mai nilovin, Dengue leh Malaria vang a ni thei a, hei vang hian COVID-19 negative te pawh in test turin an ngen bawk.