Chanchin thar thenkhat :

Chhuitu tur la chiang lo

Mizoram Lokayukta Chairman C. Lalsawta IAS (Rtd) chuan Swadesh Darshan Scheme-II (Skywalk/Ropeway) hnuaia hmalakna chung-chang complaint an dawn chu Anti Corruption Bureau (ACB) nge Central Bureau of Investigation (CBI) a chhuitir dawn tih thutlukna a la siam loh thu a sawi. MNF party atanga complaint an dawn chungchanga zawhna chhangin C. Lalsawta chuan CBI chhuitir a nih dawn chuan state sawrkar atangin chhui phalna an rawn dil a ngai dawn tih sawiin, thutlukna siam a la har rih thu a sawi a. “ACB ka chhuitir dawn em ni ang, nge CBI ka chhuitir dawn, Preliminary Inquiry ACB ka ti phawt ang a, chumi zawhah CBI tih te pawh ngaihtuah tham a la ni,” a ti. Mizoram Lokayukta chuan thubuai lut chhuitu tur thawktu a la neih loh avangin ACB-ah an thawn thin a, thubuai lian zual ah chuan CBI hnenah pawh thubuai an thawn thei bawk a ni.

Minister hovin chhim

Tourism Minister Robert Romawia Royte leh Tourism Department Officer te chuan Inrinni zan khan ni thum awh tur International Tourism Mart vawi 9-na hawnna Kohima, Nagaland-a neih chu an chhim a, International Tourism Mart hi kum 2013 atang khan India rama hmarchhak States ten in thlen chhawk thin in, hmarchhak lama tourism pholan leh chawikan nan Ministry of Tourism, Govt. of India in a huaihawt thin a, Mizoram in nakum ah chuan a thlen ve tawh beisei a ni.

ASF hri luhna finfiah harsa

AH&Vety Department hotute chuan Mi-zoram-a African Swine Fever (ASF) luhna chu finfiah a har tih sawiin, “Kan thenawm State Maghalaya, Assam, Manipur leh Nagaland-ah te ASF hi hmuh a ni a. Hetihlai hian ASF vanga Vawk thi an awmna hmasa Lungsen chu Bang-ladesh atanga kai a ni em tih finfiah a har a. He hri hi Sanghal ah hmuh anih bawk avangin a luhna tak hi hriat a har a ni,” an ti.

Thu ziaktu L. Keivom boral

Mizo zinga thu ziaktu hriat hlawh tak leh Manipur atanga IFS Officer hmasa ber Lalthlamuong Keivom (L. Keivom) chu nimin zing dar 5:46 khan natna hrang hrang vangin Delhi-ah a boral a, naktuk ah vuiliam a ni ang. Kum 82-a upa L. Keivom hi thu leh hla lama tui mi niin a lehkhabu ziah ‘Zoram Khawvel-1’ chu MAL-in Book of the Year-ah a thlang tawh nghe nghe a ni.

COVID-19 vaccine pe zel

Inrinni thleng khan Mizoram-ah COVID-19 Vaccine Dose 12,72,559 pekchhuah a ni tawh a, Mizoram-a Vaccine la thei, kum 18 chung-lam te zingah mi 1,15,627 te chuan Vaccine Dose 1-na la tawhin an zinga 5,56,936 te chuan Dose 2-na an la tawh bawk a ni. Hetihlai hian India ramah chuan nimin thleng khan mi vbc. 121.94 chuang Vaccine pek an ni tawh thung.