State pahnih CM ten inbiakna an nei dawn

Mizoram Chief Minister Zoramthanga leh Assam Chief Minister Himanta Biswa Sarma te chu State pahnih ramri buai chinfel tumin zanin hian Delhi-ah an inbe dawn.

Thudawn danin Delhi-a cham mek Chief Minisster Zoramthanga leh Union Home Minister Amit Shah te an inbiak hnuah State pahnih Chief Minister-te inbia se tih rawtna hi a awm a. Vawiin hian Himanta Biswa Sarma hi Delhi-ah thlawkthla-in zanin-a inbe turin ruahmanna siam a nih thu dawn a ni a. An inbia a nih chuan State pahnih ramri buai chungchanga Political Level-a inbiakna hmasa ber tur a ni anga. State pahnih sawrkar Official-te chu vawi engemawzat lo inbe tawh thin mah se tun thleng hian ramri buai chinfelna a la hnai lo rih niin a lang a. Ramri-ah boruak rit tak a la awmzui reng bawk a ni.

Kum 1993-a Kolasib leh Cachar District ramri-a State pahnih Police te inkap mai thei a an inep hnu khan Chief Secretary bakah Official dangte nena inbiakna kalpui a ni a. Political Level inbiakna tur pawh ruahman a ni a. Khatihlaia Chief Minister Lal Thanhawla leh Hiteswar Saikia kha Guwahati a inbe turin sawrkar laipuiin ruahmanna a siam a. Mahse, Lal Thanhawla khan Assam chhung nilova inbiak a duh thu a sawi a, Chief Minister pahnih te inbiak tura ruahmanna chu a tlawlh zui ta a ni.