MZP in an hmalakna tur hrang hrang an puang

Mizo Zirlai Pawl (MZP) General Hqrs. hruaitu thar te chuan nimin khan Aizawl-ah thuthar thehdarhtute kawmin an hmalakna tur hrang hrang te an sawi.

Thuthar thehdarhtute an kawmna ah hian MZP President Lalnunmawia Pautu chuan MZP chu Zirlai pawl a nih angin zirna an ngaih pawimawh ber dawn thu a sawi a, an hmalakna tur hrang hrangte tarlangin CADC huamchhunga awm Zofate Chawlhbuk, Borapansury a mi Mizo sumdawng leh zin veivak ten chawlh hahdam nana an hman tangkai em em thin chu a remchang hmasa bera tlawh an tum thu a sawi. Hei bakah hian tunhnaia NABARD pawisa puka Mizoram School Education Department in thingtlang sikul tihchangtlunna tur hna an thawh mekah thil felfai lo tam tak awma an hriat thu sawiin, theih ang anga bawhzui a chhuizui turin Committee an din tih sawiin, MZP Hqrs., Sub-Hqrs., Branch leh Hnampual hruaitute pawh anmahni huamchhunga sikulte lo endik a, lo chhuizui turin hriattîrna an tichhuak tawh a. Tunkar chhungin report theuhte chu General Hqrs. ah an thehlut anga, a tul angin hma an lak zel tur thu an sawi bawk. Hei bakah hian zirlaite hnena Scholaarship sem tur pawh an enzui zel tur thu an sawi bawk.