Hri kai hmuhchhuah sang nga tling dawn hnai

Serchhip District-ah COVID-19 hri kai hmuhchhuah chu mi sang nga an tling dawn hnai ta a, hri kai enkawl dam pawh an pung ve zel.

Nimin khan Serchhip District-ah COVID-19 hri kai mi 25 hmuh belh an awm leh a, heng bakah hian Serchhip-a TrueNat Laboratory-ah niminpiah khan hri kai mi 15 hmuh an ni bawk a, an vai hian Serchhip khawpui chhung ami te niin P&E Veng mi 6, Chanmari Veng leh IOC Veng mi 3 ve ve bakah EMRS, New Serchhip leh Chhim Veng mi pakhat theuh an ni a. Rapid Antigen Test hmangin Thenzawl ah hri kai mi 6 leh Serchhip-ah mi 6 hmuh belh an awm bawk. Heng te nen hian nimin thleng khan Serchhip District-a COVID-19 hri kai hmuhchhuah chu 4995 an tling tawh a ni.

Nimin khan Serchhip District-ah hri kai mi 38 te enkawl dam niin anmahni enkawlna hmun atanga chhuahtir an ni ve leh a, heng te nen hian Serchhip District-a hri kai enkawl dam chu 4548 an tling tawh bawk a, hri kai hmuhchhuah atanga chhutin za zela 91.05 te chu enkawl dam an ni tawh a, hri kai enkawllai 429 la awmin hri kai te zingah mi 15 an boral tawh bawk a ni.