Pathianni-a hri kai 94 hmuh belh an ni

Pathianni khan Mizoram-ah COVID-19 hri kai mi 94 hmuh niin hri kai hmuhchhuah hi tlem mah se Sample enfiah 875 atanga chhut chuan za zela 10.74 zetin hri an kai a ni.

Pathianni khan ZMC-a RT-PCR Laboratory, Fluorescent Immunoassay leh District hrang hranga TrueNAT Laboratory-ah Sample enfiah awm lovin Sample enfiah zawng zawng hi Rapid Antigen Test hmanga Sample enfiah te an ni a, hri kai hmuhchhuah mi 94 zinga 34 te hi Aizawl District-a hri kai hmuh te an ni a, Champhai District-ah hri kai mi 18 hmuh niin Saitual District-ah 16, Khawzawl District-ah 14, Lawngtlai District-ah 5, Mamit District-ah 4, Kolasib District-ah 2 leh Lunglei District-ah hri kai mi pakhat te hmuh an ni.

Nimin khan Mizoram-ah hri kai enkawl dam mi 438 awm belhin heti hian nimin tlai thlenga Mizoram-a hri kai hmuhchhuah tawh chu 1,34,373 an ni a, an zinga 1,30,419 te enkawl dam ni tawhin za zela 97.05 te enkawl dam an ni tawh a, hri kai enkawllai 3461 an la awm a. Nizan hmasa khan hri kai boral mi pakhat awmin nimin ah mi pakhat boral leh bawkin Mizoram-a hri kai zingah mi 493 an boral tawh a ni.