Latest News

Khaw pahnih hmun khuahkhirh bikah puan an ni

Serchhip District Bawrhsap Kumar Abhishek IAS chuan tunhnaia Serchhip District chhunga COVID-19 hri kai hmuhchhuah tamna Leng khua leh Chekawn khua te chu COVID-19 hri darh zel thei dinhmunah a ding nia a lan avangin hmun khuahkhirh bik (Restricted Area) atan a puang a. Chekawn khua ah hian tunhnaiah hri kai mi 20 lai hmuhchhuah ni tawhin enkawl dam an awm chho tan mek a, Leng khua ah hian hri kai mi 52 hmuh ni tawhin enkawl dam an la awm lova, hri kai te enkawlna atan hian 4C pahnih siam a ni bawk.

Chanchin thar thenkhat :

MLA hlui C. Ramhluna vuiliam

Mizoram sawrkar-a MLA hlui leh SEDP Industrial Development Board Vice Chairman nilai C. Ramhluna chu nizan hmasa khan boralin nimin khan vuiliam a ni. Kum 74-a upa C. Ramhluna hian insawiselna hrang hrang a neih avangin hun engemaw chen a inenkawl tawh a, nizan hmasa dar 8:40 khan Ebenezer Medical Center, Aizawl ah boralin nimin khan vuiliam a ni. C. Ramhluna hi Environment & Forest Department-a hotulu ber, Principal Chief Conservator of Forests (PCCF) atanga a pension hnuin, kum 2008 khan Mizoram MLA inthlanah MNF party ticket-in Lawngtlai West Constituency-ah thlantlin a ni a, tun sawrkar kal mekah hian SEDP Industrial Development Board-ah Vice Chairman a ni mek bawk a ni.


MRB Branch thar hawng


Mizoram Rural Bank (MRB) Branch 94-na ni turin nimin khan South Vanlaiphai khua ah MRB Branch thar hawn a ni a, MRB Chairman V. Jayachandra chuan Branch thar hi a hawng a ni. He hunah hian MRB Chairman chuan MRB chu Regional Rural Bank a nih angin Mizoram chhunga mamawhtute tan din a nih thu a sawi a, tunah hian District zawng zawng dapchhuakin Branch 94 an din tawh thu sawiin, chhungkaw tin te chu an sum khawlna atan leh an eizawnna kawnga hma an sawn theihna atan Bank in loan a neih te hmang tangkai turin a chah bawk a ni.


ST Certificate cancel phut

Mizo Students’ Union (MSU) General Hqrs. chuan June 27, 2018-a DC, Aizawl District Judicial Branch in Scheduled Tribe Certificate (Regd. No.CCC15030036113 of 27th June 2018) a tihchhuah Kamlova Chhangte s/o Thangchhuana Chhangte, Thuampui, Aizawl chu Mizo Customary Law (Mizoram Gazette Extra Ordinary No.XXXIV) a tarlan angin Mizo Hnam-ah pawm thei lovin nimin, Nov. 23, 2021 khan Aizawl DC hnenah he Scheduled Tribe Certificate hi cancel tura ngenna an thehlut.


Result enna website siam

Mipui ten an chawr tangkai zawk theih nan Zoram Medical College, Falkawn chuan online a RT-PCR result enna website an ruahman thar a. He website zmcvrdl.com-ah hian ZMC OPD ENT-a sample lak te result bakah  pawn lam atanga RT-PCR sample lak te result chu SRF ID chhut luhin a en in a download theih tawh a ni.


MINECO-ah Open Gym hawng

Kum 2019-2020 SEDP sum cheng nuai 60 hmanga MINECO-a Open Gym siam thar chu nimin khan Sports, Youth Affairs, ICT & Tourism Development Board Vice Chairman TC. Pachhunga chuan a hawng a, he Open Gym-ah hian insawizawina hmanrua chi hrang hrang 21 a awm a ni.


Celebration of Iconic Week

India ram zalenna champha 75-na lawmna kal mek, Azadi Ka Amrit Mahotsav hnuaiah Food Corporation of India, Divisional Office Aizawl chuan nimin khan Aijal Club-ah ‘Celebration of Iconic Week’ an hmang a, Agriculture Minister C. Lalrinsanga chuan he hun hi an hmanpui a ni. FCI, Divisional Office Aizawl mawhphurhna la mektu Zodinpuii Ralte chuan FCI in rampum leh Mizoram a hma a lak dante a tarlang a. State tam tak ten FCI in buhfai a pek te chu an lak sen vek loh laia Mizoram in allotment an la vek thei chu lawmawm a tih thu a sawi lang bawk. FCI hian Mizoram pumah Food Storage Depot (FSD) 6 nei mekin Sairang leh Khawzawl-ah te a dang ruahman mek a ni bawk.

Comments

Chhiar Hlawhte

Book of the Year hlan