Latest News

Khaw pahnih hmun khuahkhirh bikah puan an ni

Serchhip District Bawrhsap Kumar Abhishek IAS chuan tunhnaia Serchhip District chhunga COVID-19 hri kai hmuhchhuah tamna Leng khua leh Chekawn khua te chu COVID-19 hri darh zel thei dinhmunah a ding nia a lan avangin hmun khuahkhirh bik (Restricted Area) atan a puang a. Chekawn khua ah hian tunhnaiah hri kai mi 20 lai hmuhchhuah ni tawhin enkawl dam an awm chho tan mek a, Leng khua ah hian hri kai mi 52 hmuh ni tawhin enkawl dam an la awm lova, hri kai te enkawlna atan hian 4C pahnih siam a ni bawk.

KMMTTP peihfel thuai dan tur Governor in sawipui

Mizoram Governor Hari Babu Kambhampati chuan nimin khan Mizoram PWD leh Revenue hotulu te chu Kaladan Multi-Modal Transit Transport Project (KMMTTP) chungchang a sawipui.

Raj Bhavan Video Conference Hall-a he sawihona hunah hian MPWD atangin Powerpoint hmangin project hmasawnna leh thlenchin bakah harsatna thenkhat te sawifiah niin, Revenue Department atangin Land Acquisition chungchanga hmalakna kal mek te ngaihthlak a ni bawk. KMMTTP hi Ministry of External Affairs (MEA), Govt. of India hmalakna a ni a; he project hi India in a thenawm ram te nena inlaichinna tha zawk a neih theihna tura a ruahman, project pawimawh tak a ni.

He hunah hian Governor Hari Babu Kambhampati chuan Mizoram in tunah hian project pawimawh tak pahnih KMMTTP leh Rel Kawng siam hna a nei mek a. Heng Project pahnih te hi Mizoram leh hmarchhak tan mai ni lo, India tana project pawimawh a ni, a ti. Heng project thawh mekah hian Central dawr a ngaih pawn theihtawp a chhuah dawn tih sawiin, KMMTTP peihfel a nih theih nan Mizoram chhunga MPWD te hnathawh zawh mai a tawk lova, Myanmar chhunga Ministry of External Affairs in hna a thawh te pawh peihfel tho a ngaih avangin MEA-ah pawh ngenna a siam tur thu a sawi bawk. Governor chuan he project siam zawh a nih hunah Mizoram leh Kolkata inkar chu tuna kawng hman mek aiin a chanve lain a tawi dawn a. Hei hian bungraw phurh man a tih tlawm mai bakah Mizoram chu sumdawnna kawtchhuahah a siam dawn a ni, a ti.

Mizoram PWD tarlan danin KMMTTP-ah hian Sector 5 awmin Lawngtlai - Zorinpui (87.51 KM), Zorinpui - Kaletwa (45 KM), Kaletwa - Paletwa (60.70 KM), Paletwa Lawngchawlhna - Sittwe Lawng chawlhna (150 KM) leh Sittwe Lawngchawlhna - Kolkata Lawng chawlhna (539 KM) te a ni a. KMMTTP Route hian Kolkata leh Mizoram inkar kawngpui awm mek KM 1764 chu KM 882.21-ah a ti tawi dawn a ni.

MPWD te hian Lawngtlai - Zorinpui kawngpui siam hna chu kum 2013 khan an thawk tan a, Project hnathawhna sum hi a tirah cheng vbc. 579.65 ruahman niin hei hi ennawn a nih hnuah cheng vbc. 1028.15-ah a chho tawh a. Tunah hian KM 87.51-a thui kawngpui siam turah KM 84.19 siam zawh a ni tawh a; Lei dawh hna hmun 8-ah thawh mek a ni bawk. MPWD te chhut dan chuan he project hnathawk mekah hian a siam hna 96.21% zawh a nih tawh a, project hnathawhna sum 95.68% hmuh tawh a ni bawk a. Project ennawnna sum hmuh tur engemawzat hi hmuh a la ni lo a, ram lak tur chungchangah Court case kallai a awm mek bawk a, heng harsatna te hi chinfel thuai an beisei thu leh kum khat chhungin he project MPWD khawih chin chu zawhfel an beisei tih an sawi bawk.

Comments

Chhiar Hlawhte

Book of the Year hlan