Latest News

Puantahtute tan Company din dan zirhona neih a ni

Puantahtu ten mumal taka puantahna Company an din theih nana thil pawimawh inhrilh-hriatna chu Zirtawpni leh Inrinni khan Thenzawl khua ah neih a ni.

Thenzawl SDO (Civil) Amol Srivastava IAS hmalakna a Thenzawl a puan-tahtu mimal leh pawl hrang hrangte tana Puantah a sumdawng Company din dan (establishment of weaver producer company) zirhona ah hian Hnatlang Producer Company dintuten thu sawina hun an hmang a. Anni hi hi Thenzawl behchhana Weaver Producer Company niin, Mizoram-a a hmasa ber an ni a, he hunah hian anmahni kai-hruaitu (Mentor) Dr. Rama Raswamy, Associate Professor, MZU hovin an tel a ni.

He hunah hian Weavers Service Centre, Ministry of Textile, Govt. Of India ten Help Desk an buatsaih nghal a, sawrkar laipuiin puan-tahtute tana hmalakna a neih hrang hrangte pho chhuakin, zirhonaa tel puantahtu thenkhatte pawhin an mamawh dilnate an thehlut nghal a ni. Indian School of Business, Hyderabad mithiamte nen marketing lam leh a thehlar lama hmalak dan tur thawh hona pawh kalpui mek a ni a. Zirhona ah hian an aiawh Team pakhat rawn telin, puantahtute nena inkawmhona te an nei bawk.

He hun hmanpuitu Thenzawl SDO (C) Amol Srivastava chuan puantahtute mamawh zirtir tura lokal MZU mithiamte, Hnatlang Producer Company te, Indian School of Business, Hyderabad leh Weavers Service Centre chungah te lawmthu sawiin, Thenzawl-a puantahtuten hmasawnna thar an hmuh zel theih nan hetiang lam zirhona dang pawh buatsaih chhoh zel an tum tih a sawi a, he hun hi puantahtu mi 200 aia tamin an chhim a ni. 

Comments

Popular News (Last 30 Days)