Mizoram Governor in MHIP hruaitute a kawm

Mizoram Governor Hari Babu Kambhampati chuan nimin khan Mizo Hmeichhe Insuihkhawm Pawl (MHIP) General Hqrs. hruaitute chu Raj Bhavan-ah kawmin MHIP hruaitute chuan an hmalakna te hrilhin Mizoram tana thil pawimawh zual te an sawipui bawk.

He an inkawmna ah hian MHIP hruaitute chuan MHIP hmalakna te an sawi a, heng bakah hian ramri buaina chungchanga Assam lamin Status Quo an bawhchhiat thu te, Governor pawh a theihna zawna Central Sawrkar dawr tura an duh thu te an sawi a. Mizoram-ah Myanmar raltlan sang tam tak an awm mek thu te an sawi a. Heng raltlante tana an theihna zawna luanchhuah hna an kalpui mek te pawh an hrilh a ni. MHIP hruaitute chuan Refugee Camp-ah tui thianghlim mamawhna a san thu te, ei leh in tlakchhamna a awm mek thu te, Camp chhungah inbual leh inthiarna mumal a awm loh avangah hriselna atan thil pawi a thlen theih thu te an sawi a. Governor chu a theihna zawnah Refugee te dinhmun khawngaihthlak tak hriatthiam pui a hma lak sak turin an ngen bawk. He hunah hian MHIP General Hqrs. hruaitute hi an President T. Lalthangpuii hovin an tel a ni.