Latest News

Khaw pahnih hmun khuahkhirh bikah puan an ni

Serchhip District Bawrhsap Kumar Abhishek IAS chuan tunhnaia Serchhip District chhunga COVID-19 hri kai hmuhchhuah tamna Leng khua leh Chekawn khua te chu COVID-19 hri darh zel thei dinhmunah a ding nia a lan avangin hmun khuahkhirh bik (Restricted Area) atan a puang a. Chekawn khua ah hian tunhnaiah hri kai mi 20 lai hmuhchhuah ni tawhin enkawl dam an awm chho tan mek a, Leng khua ah hian hri kai mi 52 hmuh ni tawhin enkawl dam an la awm lova, hri kai te enkawlna atan hian 4C pahnih siam a ni bawk.

Swadesh Darshan Scheme-II hnuaia hmalakna chhui turin Lok Ayukta-ah complaint thehluh a ni

Swadesh Darshan Scheme-II hnuaia Mizoram Tourism hmasawnna tura hmalakna hrang hrangah thil dik lo leh fel tawk lo a awm ngei nia a lan avangin MNF Vigilance Department leh MNF Legal Board-te hmalakna in nimin khan Mizoram Lok Ayukta-ah complaint thehluh a ni.

Hemi chungchanga MNF Legal Board Vice Chairman Lalpianfela Chawngthu in nimin-a thuchhuah a siam ah Mizoram Sawrkar chuan kum 2018 khan Restricted Tender hmangin Sakawrhmuituaitlang Sky Walk leh Durtlang - Chaltlang Ropeway Project atan Joint Venture NEIP leh Ropeway & Resorts Pvt. Ltd. Dwarkar, New Delhi-te chu Contractor atan a thlang tih sawiin, heng Contractor-te hnenah hian Mobilization Advance 10% pekchhuah tur a nih laiin 10% aia tam daih Mizoram Tourism Department hian a pechhuak tih a sawi a. Sakawrhmuituaitlang Skywalk atan hian 10% Mobilization Advance zat tur chu cheng nuai 48.50 a nih laiin cheng nuai 287.25 pekchhuah niin Durtlang - Chaltlang Ropeway atan Mobilization Advance zat tur chu cheng nuai 248.25 a nih laiin cheng nuai 1317.80 pek chhuah a ni bawk tih sawiin, heng Mobilization Advance pawisa te hi Mizoram Tourism Department chuan kum 2017-2018 inkar khan a pe chhuak nia a laan thu a sawi a ni.

Hetiang zat sum leh pai hi Contractor-te hnenah pekchhuah a ni tawh chungin heng Project-ah te hian hmalakna mumal hmuh tur Vawiin thlengin a la awm lo tih pawh sawiin, hetiang hi thil awmdan a nih avangin Swadesh Darshan Scheme - II chungchangah hian thil dik lo, sawrkar sum leh pai hman dik tawk lohna leh dan bawhchhiatna a awm ngei nia a lan thu sawiin, heng sum leh pai tihchingpen nia langah hian khatih laia Tourism Minister nge kan sawrkar Official-ten mawhphur tih chu mipuite pawhin an hre duh tih sawiin, a mawhphurtu chunga dan hnuaia hmalak ngei pawh hi mipuite duhdan a ni, a ti bawk.

Heng sawi bakah pawh hian Swadesh Darshan Scheme - II hnuaiah hian component dang a la awm nual tih pawh sawiin, thil fel lo, sum leh pai hman dik lohna leh dan bawhchhiatna dang pawh awm thei tih MNF Legal Board Vice Chairman chuan sawiin, “Chuvangin Swadesh Darshan Scheme – II chungchang hi uluk leh ngunthluk taka min chhuichhuak sak a, dan bawhchhia an awm a nih chuan dan hnuaiah hrem an nih ngei theih nan a rang thei ang bera hma min laksak nghal turin Mizoram Lokayukta hi kan ngen a, complaint hi kan siam a ni,” a ti.

Mizoram-ah hian rorel lai party-in sawrkar sum leh pai chingpen nia lang chungchang ah FIR emaw, Complaint emaw thehluh hi thil thleng zen zen lo a nih thu pawh MNF Legal Board Vice Chairman chuan sawiin, “MNF chuan kan sawrkar, Kan Chief Minister leh Minister dang te pawh chhui thei turin Lok Ayukta bul kan tan a. Bul kan lo tan tawh ang ngeiin Vawiin-ah hian keimahni sawrkar siam ngei pawh chhui a nih theihna turin complaint kan thehlut a. Mizoram-ah hian diknain rorel se la, eirukna leh hlemhletna hi bo se tih hi MNF duhdan a la ni reng a ni,” tiin he complain hi MNF Vigilance Department-a Joint Secretary Lalmuanchhana Sailo hminga thehluh a nih thu a sawi bawk.

Nimin-a Lok Ayukta-a Complaint an theh-luh ah hian RTI hmanga hemi chungchang an zawhna chhanna te pawh an thiltel nghal a, RTI hmanga zawhna an zawh chhanna ah hian Chaltlang to Durtlang Ropeway (Cable Car) leh a kaih-hnawih atana sum sanction chu 27.03.2017 ah hmuh a nih thu leh 30.08.2017-ah Work Order pek a nih thu te, Ministry in sum a sanction cheng nuai 2482.58 atangin cheng nuai 1241.29 Mizoram sawrkar pe tawhin Contractor hnenah cheng nuai 1317.80 pek a nih tawh thu te pawh tarlan a ni bawk.

Comments

Chhiar Hlawhte

Book of the Year hlan