CM in Home Minister kawm

New Delhi-a cham mek Mizoram Chief Minister Zoramthanga chuan niminpiah tlai khan Union Home Minister Amit Shah chu a chenna In ah hmuin Mizoram mamawh hrang hrang a thlen.

Chief Minister chuan Zokhawsang-a Assam Rifles insawn chhuak tur chu harsatna hrang hrang avangin huntiam chhunga an insawnchhuah hman loh dan leh hemi avanga khawpui chhunga hma-sawnna ruhrel din tura lo ruahman tawh thenkhat a tihkhawtlai phah thu a thlen a. Economy tihhmasawnna atanga hmalakna pakhat Bamboo development kalpui mek chu a hlawhtlinna atan Link Road a pawimawh thu leh, chumi chu siam tura State in sawrkar laipui tanpuina a mamawh thu a sawi a. Economy kaihhnawih dang hrang hrang an sawidun bakah kum 1986 Mizo Accord sign a nih hnu a returnee te tana In leh lo dinna tur puihna, Housing Assistance pek chungchang a sawipui bawk.

Union Home Minister Amit Shah chuan Chief Minister in a thil thlen hrang hrangte chu lo zirchianga, hmalak theih dan awm te ngaihtuahin remchang hmasa bera sawidun pui leh a tiam a ni.

Chief Minister hian niminpiah tlai khan NITI Aayog Vice Chairman Dr. Rajiv Kumar chu a Pisa-ah hmu bawkin Mizoram economy tihhmasawn kawnga thu pawimawh tak tak an sawi dun a. Sum dinhmun te sawiin, hripui leng avanga ram pumin harsatna a tawh dan leh Mizoram leh India hmarchhak State dangte a nghawng dan te sawi a ni a. Tunah hian India economy chu hma a sawn chhoh dan te sawiin, Chief Minister chuan hmarchhak State te'n sawrkar laipui atanga an sum hmuh ang tur te pek an nih thuai theih nan hmalak ni se a ti a. Mizoram economy tihhma-sawna atana Bamboo Development kalpui mek ah link road mamawhna te a sawi bawk. Chief Minister hian sawrkar mi pawimawh dangte a kawm bawk a ni.