Mizoram-a COVID-19 hri leng dinhmun thlirhona neiin inthlahdah ala hun lo tih tarlan a ni

Nimin khan Health Minister Dr. R. Lalthangliana hovin SAD Conference Hall-ah Mizoram COVID-19 dinhmun thlirhona neih a ni.

He thutkhawm ah hian Aizawl Mayor leh Chief Secretary bakah sawrkar mi pawimawh leh khawtlang leh Kohhran hruaitute pawh an tel a, Mizoram a COVID-19 hri kai thar an tlem tial tial tan ta nia lang chu hmasawnna lawmawm tak a nih rualin Sample Test hi Symptomatic based a kalpui a nih tawh avangin Positivity Rate a sang lo thei lova, inthlahdah mai a la hun lo tih he hunah hian sawilan a ni a. India hmarchhak State dangte aiin COVID-19 vanga nunna chan tun dinhmunah kan pung chak zawk a, a hmaa keini aia nunna chan tam zingah Sikkim leh Arunachal Pradeh kan lehpel tawh a, mitthi kan neihte dinhmun zirchianin symptom neih hnu pawha in test lawk lo leh vaccine la lo an tam hle a, hei vang hian mipuite hnenah zirtirna uar lehzual zawka kalpui a tha nia an hriat thu pawh tarlan a ni bawk.

Mask vuah tura inzirtirna beihpui thlak ‘All Mask Campaign’ kumin December ni 31 thlenga kalpui chhunzawm tur chungchangah uar lehzuala mipuite zirtirna kawnga tan lak a tul thu sawi a ni a, All Mask Campaign in thingtlang khaw engemaw zatah chuan awmzia a nei hle tih he hunah hian tarlan a ni bawk a. Hunpui lo thleng turah mipuite fimkhur hle a ngaih thu tarlan niin, COVID Appropriate Behaviour zawm tha lehzual tura inzirtirna ngawrh lehzuala kalpui tha an ti bawk.

IDSP Nodal Officer Dr. Pachuau Lalmalsawma tarlan danin tun thla, November ni 1 atanga 23 thleng khan Mizoram-ah COVID-19 hri kai thar mi 11,196 awmin heng te hi mipa 5119 leh hmeichhia 6077 an ni a, hri kai enkawl dam mi 7136 awmin nunna chan mi 20 an awm a ni. Tun thla chhunga hri kai hmuhchhuah thar zinga 6309 (56.35%) hian symptom an nei a, hri kai hmuhchhuah zinga 5670 (50.64%) hi Aizawl District-a mi an ni. Hri kai hmuhchhuah thar zingah hian kum khat tling lo mi 114 an awm a, kum 1 leh 10 inkar mi 1590, kum 11 leh 20 inkar mi 2705, kum 21 leh 30 inkar mi 1821, kum 31 leh 40 inkar mi 1716, kum 41 leh 50 inkar mi 1205, kum 51 leh 60 inkar mi 902, kum 61 leh 70 inkar mi 598, kum 71 leh 80 inkar mi 349 leh kum 81 chunglam mi 187 an awm a ni.

COVID-19 vaccine dose 12,65,203 chu Mizoram-ah pekchhuah tawh a ni tih tarlan niin 1st dose la hi 92% ni tawhin Full dose la hi 78% an ni. Tar chak lo, damlo leh chhan hrang hrang vanga vaccine pekna hmun pan thei lote chu an In-ah kalchilhin vaccine pek an ni a, first dose hi mi 695 hnenah pek tawh niin, full dose la mi 217 an awm tawh a ni.

Comments

Popular News (Last 30 Days)

Vawiin-ah HSLC result

Vawiin-ah HSSLC Exam result