Mizoram-a hri kai hmuhchhuah tlahiam hret hret

Mizoram-ah COVID-19 hri kai hmuhchhuah thar an tlem ve zel a, Zirtawpni-a Sample enfiah atangin hri kai 359 hmuhchhuah an awm laiin Inrinni-a Sample enfiah 3140 atangin hri kai 358 hmuh leh an ni a, Sample enfiah atanga za zela 11.40 te chuan hri an kai a ni.

Inrinni khan ZMC-a RT-PCR Laboratory-ah Sample 595 enfiah niin heng atang hian hri kai mi 65 hmuh an ni a, an vai hian Aizawl District-a Sample lak te niin Chawlhhmun-ah hri kai mi 11 hmuh tih loh chu Veng leh khaw mal a hri kai hmuhchhuah tam lutuk an awmlo a ni. Fluorescent Immunoassay Test hmangin Inrinni khan Sample 19 enfiah ni bawkin heng atang hian hri kai mi 8 hmuh an ni .

District hrang hrang-a TrueNat Laboratory-ah Khawzawl tihloh District dang zawngah Sample enfiah niin Sample enfiah zawng zawng 96 atangin hri kai mi 14 hmuh an ni bawk a, Mamit District-ah 5, Hnahthial District-ah 3, Kolasib leh Serchhip District-ah 2 ve ve leh Lunglei leh Saitual District-ah pakhat ve ve an ni bawk.

Rapid Antigen Test hmanga hri kai hmuhchhuah erawh an la tam viau a, Inrinni khan Sample 2430 enfiah niin heng atang hian hri kai mi 271 hmuh an ni bawk a, an zinga 103 te chu Aizawl District-a hri kai hmuh te niin Saitual District-ah 49, Serchhip District-ah 38, Siaha District-ah 34, Champhai District-ah 16, Lunglei District-ah 11, Lawngtlai District-ah 9, Kolasib District-ah 5 leh Mamit leh Hnahthial District-ah mi 3 ve ve te an ni.

Mizoram-ah hri kai te zingah Inrinni khan mi 466 enkawl dam niin nimin khan tlai dar 5:00 thlengin mi 282 enkawl dam an ni leh bawk a, heti hian nimin tlai dar 5:00 thleng khan Mizoram-a hri kai hmuh tawh chu 1,34,279 niin an zinga 1,29,954 te enkawl dam an ni tawh a, hri kai zinga zaa 96.78 te enkawl dam ni tawhin hri kai enkawllai 3834 leh hri kai boral 491 an awm tawh a ni.