Latest News

Khaw pahnih hmun khuahkhirh bikah puan an ni

Serchhip District Bawrhsap Kumar Abhishek IAS chuan tunhnaia Serchhip District chhunga COVID-19 hri kai hmuhchhuah tamna Leng khua leh Chekawn khua te chu COVID-19 hri darh zel thei dinhmunah a ding nia a lan avangin hmun khuahkhirh bik (Restricted Area) atan a puang a. Chekawn khua ah hian tunhnaiah hri kai mi 20 lai hmuhchhuah ni tawhin enkawl dam an awm chho tan mek a, Leng khua ah hian hri kai mi 52 hmuh ni tawhin enkawl dam an la awm lova, hri kai te enkawlna atan hian 4C pahnih siam a ni bawk.

Tripura-a inbenbel thlang Bru mi thenkhat ten Mizoram-a rawn let leh dan an dap mek

Tripura Relief Camp a awm, Mizoram chhuahsan a Tripura-a inbenbel thlang fel tawh mi engemaw zat te chuan Mizoram a rawn let leh dan kawng an dap mek a, chung mite chuan Tripura mite leh Bengali te nen a inmil theih loh vanga rawn let duh angin an insawi nia thudawn a ni. 

Hemi chungchangah hian Central YMA President Vanlalruata chuan Tripura Bru Refugee Camp a awm thenkhatte hnen atangin phone call in ngenna a dawng tih thuthar thehdarhtute hrilhin, Tripura mite leh Bengali te nen an inmil loh avangin Mizoram a inbenbel an duh leh zawk tih an rawn hrilh thu leh an duhna an rawn thlen chu a tlai tawh thu bakah MoU sign atang pawh a kum 2 dawn a vei leh tawh thuin a lo chhang tih a sawi a. Amah rawn betu chuan mi engemaw zat Mizoram a inbengbel a, rawn let duh leh ta zawk an awm niin a rawn sawi tih Vanlalruata chuan a sawi a. Amah rawn betute chuan Mizoram sawrkar ah heng an duhna te hi an thlen em tih erawh hriat zui a nei lo niin a sawi bawk.

Hemi chung changah hian Mizoram Bru Displaced People Forum (MBDPF) General Secretary Bruno Msha pawhin Mizoram a rawn let thlang leh ta zawk an awm nia sawi chu an lo hriat tawh thu thuthar thehdarhtute zawhna chhangin a sawi a, khawi Camp a awmte nge an nih leh mi engzatnge an nih tih erawh hriat an nei lo.

Mizoram atanga Tripura-a tlanchhia Bru te lo kir theihna tur chungchangah hian January 16, 2019 khan New Delhi-ah sawrkar laipui, Mizoram leh Tripura sawrkar leh Bru aiawhten inremna thuthlung an lo ziak tawh a, he MoU ah hian November ni 30, 2019 hnu lama Tripura a Relief Camp a la awm mekte chu an duhthlanna in Tripura-ah an cheng hlen thei dawn a. Repatriation lo kalpui tawh a Mizoram a kir leh te tan erawh Tripura-ah let leh remtih a ni dawn lo a ni.

Hetihlai hian Tripura Relief Camp a awm mek te hian Dhalai District-a Haduklay leh Bongophapara-ah te an inbenbelna tur an sa mek a, North Tripura District-a Khahamthai-para (Ranipara ti a hriat thin) leh Kaskaupara-ah te inbenbelna tur In an sa tan tawh bawk a ni.

Comments

Chhiar Hlawhte

Book of the Year hlan