Latest News

Central YMA hruaitu thlanna neih tura Vote zawnga tawktar siam dawngsawng lo turin chah

Serchhip Sub-Hqrs. YMA chuan Central YMA hruaitu thlanna lo awm tura an huamchhunga YMA Branch leh Group te chu Vote zawnga tawktar siama rawn bia an awm a nih chuan lo dawngsawng lo turin an chah.

Serchhip Sub-Hqrs. YMA hian nimin khan Serchhip Sub-Hqrs. YMA Conference Hall-ah an President Kawlthuama kaihhruaiin SEC thutkhawm an nei a, he hunah hian December 16, 2021-a YMA General Conference vawi 73-na neih tur chungchang ngaihtuahin kumin a Central YMA hruaitu thlanna neih turah hian Vote zawnna atana Conference kalna senso intumsak emaw, thlenna ngaihtuah sak emaw leh thildang hmanga Group leh Branch YMA hruaitute rawn bia an awm a nih chuan heng mite hi lo dawngsawng lo turin an in chah a, hemi chungchangah hian Branch te leh Group YMA te hnenah pawh thuchhuah siam nise an ti a. Kumin a YMA General Conference neih turah hian Rorel Palai kal thei tihtlem a nih avangin an huamchhunga YMA Branch leh Group te chu Palai kal thei tur zat bithliah hnawhkhah ngei tum turin an ngen bawk a ni.

Nimin-a SEC thukhawm hian Krismas leh Kumthar vuakvet lo thleng tur chu boruak muanawm tak hnuaia hman a nih theihna turin sawrkar in halpuah leh halmawi hrang hrang leh Silai a mu nei kahchhuah theih chi khapna a siam te tha taka zawm a nih theih nan an huamchhunga hmalak dan tur relin, hunpui vuakvet-ah Branch tin ten an huamchhungah Duty Post siam leh nise an ti a, hei hi Sub-Hqrs. YMA hruaitu ten a remchan angin tlawhkual leh nise an ti a. An huamchhunga Home leh Jail bakah damdawi In hrang hrang (Hospital/CHC/PHC)-ah te Krismas thilpek hlan nise an tih bakah hunpui laia-a CCC leh 4C-a awm te pawh a remchan angin thilpek hlan nise an ti bawk.

Hei bakah hian Art & Culture Department in India ram zalenna kum 75 tlin lawmna kal zel puala Serchhip-ah Pawl Kut hmang tura Serchhip Sub-Hqrs. YMA a rawn beiseina chu a theih anga tih hlawhtlin nise tiin Organising Committee pawh an din nghal a. Serchhip District chhunga hmasawnna hnathawh enzui kawngah nasa lehzuala hmalak relin, Hualtu kawng siam mekah khawtlang in harsatna an neih te chu a theih angin thuneitute hnenah thlenpui nise an ti a, Serchhip-a Fire & Emergency te Motor pakhat chu a hmantlak meuh loh avangin hmalak nise an ti bawk.

Comments

Popular News (Last 30 Days)