Latest News

NE Education Conclave-ah Mizoram mamawh thlen

India Hmarchhak State Education Minister-te thutkhawm, North East Education Conclave chu Inrinni khan Gauhati Medical College & Hospital Auditorium, Bangagarh-ah neih a ni a, Mizoram atangin School Education Minister Lalchhandama Ralte chu a tel a ni.

He Conclave-ah hian School Education Minister chuan Mizoram in zirna lama hma a lak dan leh hma a sawn dan bakah mamawh hrang hrangte a tarlang a. Chung zingah chuan Sawrkar laipuiin Zirna kalphung thar 'New Education Policy'(NEP) 2020 hman tura a chhawpchhuak chu lawmawm a tih thu te, NEP 2020 kalpui tura hmalak dan tur chi hrang hrang - hun awh rei leh rei lo chi ruahmanna siam a nih bakah zirna lama mi thiam thiau telna Committe hrang hrang din a nih thu te leh heng ruahmanna hmang hian Mizoram State chhungah zirna tha zawk neih thuai beisei a nih thu a sawi a ni.

Zirna lama hmarchhak State te harsatna leh mamawhte tarlang telin Minister chuan Right to Education (RTE) Act, 2009 Section 7(3)-in a tarlan anga Sawrkar laipuiin State Sawrkar-te sum mamawh a pek dan tur ruahmanna ah State sawrkar nena indawrtawnna hun a bichilh avangin Samagra Shiksha Scheme hnuaia zirtirtu leh Teacher Educator-te hlawh tur Sawrkar laipuiin a ruahman chu zaa 50 dawnin a tlahniam a, hei hian State sawrkar tan harsatna namen lo thlenin sawrkar hmalakna thar tam tak pawh a kalpui mumal thei lo a ni, a ti.

Samagra Shiksha kalphung thar hnuaiah State sawrkar te rawtna in ngaih pawimawh a hlawh tawk loh avangin Zirlaibu a thlawna sem kawngah te, School Uniform a thlawna pekna ah leh Zirlai chawl tawh Secondary School lama kaitir tura sum ruahman pawh a beitham em avangin hma lak a harsat thu te, Primary School zirtirtu indaihlohna te leh ICT hmanga zirna kalpui turin Network Connectivity rintlak a tul thu te, Pre-School kalpui turin Department dang nena a inthuaha hmalak a nih loh nan kum bithliah tih fel a tul thu te Minister chuan a sawi bawk.

Heng bakah hian School Education Minister hian Higher Education lama hmalakna leh harsatna hrang hrang tarlangin, chung zingah chuan NEP 2020 kalpui mek dan te, Centrally Sponsored Scheme (CSS), Sawrkar laipui leh state sawrkar thawhdunna hnuaia thawktu lakna tur sum chungchang te bakah RUSA hnuaia hmalakna atana sum mamawhte leh RUSA 3.0 atana sum ruahman cheng vbc. 3000 la tangkhang chungchangte pawh a tarlang a ni.

North East Education Conclave-ah hian Union Education Minister Dharmendra Pradhan chu khuallian niin hmarchhak State 8-a Education Minister 8-te chu Khualtha an ni.

Comments

Popular News (Last 30 Days)