Chanchin thar thenkhat :

CM in mi pawimawh kawm

Mizoram Chief Minister Zoramthanga leh Israel Ambassador Naor Gilon bakah First Secretary (Political) Hodaya Avzada te chu nimin khan Mizoram House, Chanakyapuri, New Delhi ah an inkawm a, Embassy of Israel, India hotute nen Chief Minister leh amah tawiawmtu Official te chuan Mizoram hmasawnna hmachhawp hrang hrang te sawihoin, thawhho theih dante an sawiho a ni. Chief Minister hian Tourism Minister Robert Romawia Royte nen Lunglei leh Champhai tui lakna project siamtu tur Central Sawrkar PSU zinga mi WAPCOS hotute an kawm bawk a, Chief Minister chuan tha taka DPR te siamzo vat tura hrilhin, Aizawl Smart City Project pawh chak zawka buaipui turin a hrilh bawk.

Hmasawnna ruhrel pawimawh tak tak din a nih theih nana State sawrkar in Consultancy Firm a rawih, Telecommunications Consultants India Limited (TCIL) hotute pawh nimin khan kawm bawkin, Project an duan mek bawhzui dan tur te sawiho a ni a. TCIL hi Department of Telecommunications, Ministry of Communications hnuaia awm a ni. Chief Minister hi State Planning Board Vice Chairman leh sawrkar mi pawimawh dang ten an tawiawm a ni.

I&PR Minister in hmanpui

Mizoram Departmental Officers' Association (MDOA) khawmpui, General Body Meeting vawi 12-na chu nimin khan Taxation Department Auditorium, Aizawl-ah neih niin I&PR Minister Lalruatkima chuan a hmanpui a. I&PR Minister chuan MDOA member te chu Department hrang hranga hna leh mawhphurna pawimawh tak tak chelhtu an nih angin Sawrkar kut leh ke pawimawh tak an ni tih a sawi a, Social media in nun kawng tin renga a nghawng nasat thu sawiin, “Social Media kan hman dan hi kan fimkhur a tul hle a, thu leh hla, thlalak leh video kan post dan te hi dan kalh leh dan bawhchhiatna a ni em tih te hi kan ngaihtuah chian a ngai hle,” a ti bawk.

Congress in CBI chhuitir duh

MNF Vigilance Department leh Legal Board ten Swadesh Darshan Scheme-II hnuaia Mizo-ram Tourism hmasawnna tura hmalakna hrang hrangah thil dik lo leh fel tawk lo a awm ngei nia a lan avanga Mizoram Lok Ayukta-a complaint an thehlut ta chu Congress Party chuan lawmawm an tih thu sawiin, thil kal tawh hrang hrangte thlirin Mizoram Lokayukta hian an hnena complain lut hi CBI chhui tir ngei se an duh thu an sawi bawk.

Sawrkar Sikul-ah zirlai pung

School Education Minister Lalchhandama Ralte chuan nimin zing khan Hnahlan Higher Secondary School tlawhin sawrkar sikul-ah zirlai an luh tam theih nan theihtawp chhuah a nih thu leh, hemi chawikang tur hian zirna In thuamthat hna kawng hrang hranga thawkin sawrkar sikul khar ngai tlu chhia awm loh nan tanlak a nih thu a sawi a, tunah chuan sawrkar sikul-ah zirlai an pun tawh thu a sawi bawk.

Champhai-ah DEO Office sak thar hawn a ni

School Education Minister Lalchhandama Ralte chuan nimin khan Champha-ah District Education Office building sak thar chu a hawng. Champhai DEO Office hi October ni 1, 2018 khan sak tan niin Lushai Engineers hnuaiah C. Lalhmunliana leh HS. Vanlalfakzuala, IB Veng, Champhai te chu sa tura thlan an ni a, Building sak nan hian Rs. 2,00,62,925/- sen a nih bakah Electric wiring atan leh Education Training Hall cheibawlna bakah tual zawl siamna nen a vaiin Rs. 2,12,87,414/- sen a ni.