BRO buatsaih India ram pum fangchhuak tur Motorcyle Expedition Sports Minister in a vailiam

India ramin zalenna a hmuh kum 75-na tlin lawmna kal mek, Azaadi Ka Amrit Mahotsav lawmna peng chikhat atana Border Roads Organization (BRO) in India ram pum fangchhuak tur Motorcyle Expedition an buatsaih, Project Pushpak in Mizoram chinah an huaihawt chu Pusphak Primary School, Falkand atangin nimin khan Sports Minister Robert Romawia Royte chuan a vailiam.

He Motorcyle Expedition hi New Delhi atangin October ni 14, 2021 khan Defence Minister Rajnath Singh chuan a vailiam a. Ni 75 chhungin India dung leh vang KM 20,000 chuang chu BRO hnathawk ‘BRO Karamyogis’ ten fanchhuah an tum a. Expedition kaltangin BRO chuan kum 60 chhunga ram tana an hnathawh thehlar te, remna leh muanna atan leh Sawrkar Laipui programme, ramchhunga thilsiam hrang hrang intodelh leh ngaihsan (Atma Nirbhar Bharat) te mipuite hnena puanzar an tum a ni.

BRO huaihawt Motorcycle Expedition hi chawng 7-a then niin, KM 7000 chuang an tlan tawh a. Hmun hla leh pan harsa - Pang, Leh, Kargil, Srinagar, Prayagraj, Varanasi, Nathula Pass, Guwahati, Tezpur, Itanagar, Pasighat, Doomdooma, Jorhat, Dimapur, Imphal te paltlangin niminpiaah khan Expedition Team hian Aizawl an lo lut a. Nimin khan Mizoram-a BRO hmunpui Project Pushpak buaipuina in Expedition Leg 4, Aizawl - Kolkata chu vailiam an ni.