Serchhip District-ah Bawnglian 332 awm mekin bawnghnute tharchhuah tihpun tum a ni

Tun dinhmunah Serchhip District AH & Vety Officer huamchhungah Bawnglian vulhlai 332 a awm anga chhinchhiah niin Bawngpui hnute sawr lai erawh a tlem avangin Bawnghnute tam zawk tharchhuak thei turin hmalak tum a ni.

Nimin khan Serchhip-a Vety Department Training Hall-ah Bawnglian vuahtute tan Bawng in tha taka no a pai-a a tha taka a hrin theih dan tur zirhona, 'Fertility Camp' neih a ni a, he hun kaihruaitu Serchhip DVO Dr. R. Lalmakthanga chuan tun dinhmunah an huamchhungah Bawnglian vulh lai 332 a awm thu leh heng zinga 100 te chu Serchhip ami niin Baktawng leh Buhkangkawn-ah 88, Thenzawl-ah 43, Chhingchhip-ah 33, East Lungdar-ah 24, Khawlailung-ah 14, Bungtlang-ah 10, North Vanlaiphai-ah 8 leh an huamchhunga awm, Hnahthial District-a Thingsai khua ah 12 te a nih thu a sawi a. Amaherawh chu Serchhip District-ah hian Bawngpui, a hnute sawr lai erawh a tlem thu sawiin, tha taka Bawnghnute kan tharchhuah theih nan hian hmalak a nih dawn thu a sawi a ni.

Serchhip DVO chuan Bawng ti pung turin Bawngpui kahrai, Artificial Insemination (AI) a pawimawh thu pawh sawiin, hei hi sawrkar laipui pawhin a ngaih pawimawh thu leh Bawng chi thlah turte chu kahrai vek tura hmalak a ni tih a sawi a. Artificial Insemination tih theihna hmunah chuan a chi thlah tur Bawngpa awmlo tura ngaih a ni tih sawiin, Serchhip District-ah pawh kumin chhungin Bawngpui 59 kahrai ni tawhin Bawng no piang 15 a awm tawh thu a sawi bawk.

He hunah hian Serchhip-a Veterinary Officer Dr. H. Vanlalrawna chuan Bawnglian vulh chungchang sawifiahin, khawvel a bawnghnute tharchhuah za zela 22 vel chu India rama tharchhuah a ni tih sawiin, chutih laiin Mizoram leh Serchhip-ah te chuan Bawnglian hi a tlem tial tial a, hei hi Bawng inthlahchhawnna leh a Chaw lama harsatna a awm vang te a nih thu a sawi a. Bawnglian vulh chu tha thlah theih a nih loh avanga a hautak rualin bawnghnute chu mihring ten nitin a kan mamawh a nih avangin a pawimawh thu te a sawi bawk a ni.

He training ah hian Serchhip leh Thenzawl atangin Bawng vulhtu mi 12 leh AI Workers te tel tura koh niin Dr. Lalmuanpuia Samte, Veterinary Officer, Thenzawl chuan zirtirna a pe a, Bawnglian vulhtute tana hriat tur pawimawh hrang hrang zirtirin he huna tel Bawng vulhtu te hnenah hian bawnghnute sawrna atana an hman tur Bucket sem nghal a ni a. Chawhnu lamah Zawlpui phai-a K. Lalhmingmawia Dairy Farm-ah hun hman zui a ni bawk.