Hri kai hmuh tlahniam hret

Inrinni khan Mizoram-ah Sample 3133 enfiah leh niin COVID-19 hri kai mi 437 hmuh an ni a, Sample enfiah atanga za zela 13.95 te chuan hri an kai a ni.

Inrinni khan ZMC-a RT-PCR Laboratory-ah Aizawl District atanga Sample lak 326 enfiah niin hri kai mi 46 hmuh an ni a, Veng leh khua 17 atanga hri kai hmuh te an ni a, Aizawl District-ah hian Fluorescent Immunoassay Test hmangin Sample 8 enfiah niin hri kai mi 5 hmuh niin an vaiin Aizawl khawpui chhung ami te an ni.

District hrang hranga TrueNat Laboratory 8 atangin Inrinni khan Sample 206 enfiah ni bawkin hri kai mi 44 hmuh an ni a, an zinga 31 te chu Lunglei District-a hri kai hmuhchhuah te niin Champhai District-ah 7, Mamit District-ah 3, Serchhip District-ah 2 leh Saitual District-ah pakhat te an ni.

Rapid Antigen Test hmangin Inrinni khan Sample 2593 enfiah ni bawkin hri kai 342 hmuh an ni a, an zinga 174 te chu Aizawl District ami te niin Lunglei District atangin hri kai mi 75 hmuh an ni bawk a, an zingah hian Lunglei District Jail-a tang mi 32 an tel a ni. Kolasib District-ah hri kai mi 36 hmuh niin Serchhip District-ah 17, Mamit District-ah 13, Saitual District-ah 12, Hnahthial District-ah 7, Lawngtlai District-ah 6 leh Khawzawl District-ah mi 2 te an ni.

Inrinni khan Mizoram-ah hri kai mi 412 te enkawl dam niin nimin khan tlai dar 5:00 thlengin hri kai mi 145 te enkawl dam an ni leh bawk a, heti hian nimin tlai dar 5:00 thlenga Mizoram-a hri kai hmuhchhuah tawh chu 1,31,685 niin an zinga 1,26,308 te chu enkawl dam an ni tawh a, hri kai hmuhchhuah atanga za zela 95.92 te enkawl dam ni tawhin hri kai enkawllai 4900 an la awm a. Inrinni khan Mizoram-a hri kai zingah mi pakhat boral awmin nimin khan mi pakhat boral a awm belh leh bawk a, Mizoram-a hri kai zingah mi 477 an boral tawh a ni.