Latest News

Khaw pahnih hmun khuahkhirh bikah puan an ni

Serchhip District Bawrhsap Kumar Abhishek IAS chuan tunhnaia Serchhip District chhunga COVID-19 hri kai hmuhchhuah tamna Leng khua leh Chekawn khua te chu COVID-19 hri darh zel thei dinhmunah a ding nia a lan avangin hmun khuahkhirh bik (Restricted Area) atan a puang a. Chekawn khua ah hian tunhnaiah hri kai mi 20 lai hmuhchhuah ni tawhin enkawl dam an awm chho tan mek a, Leng khua ah hian hri kai mi 52 hmuh ni tawhin enkawl dam an la awm lova, hri kai te enkawlna atan hian 4C pahnih siam a ni bawk.

Kan aiawha roreltu kan thlan thin kan ngaihhlut zel a pawimawh - District Bawrhsap

Serchhip District Election Officer leh District Bawrhsap Kumar Abhishek chuan mipuiten langtlang taka kan aiawha roreltu kan thlang thin chu a hlu em em tih sawiin, he kalphung hlu leh zahawm tak hi vote thlak thintu mipuiten kan ngaihhlut zel a pawimawh a ni, a ti.

Serchhip District Election Office buatsaiha Electoral Literacy Club (ELC) Meeting nimin-a Govt. Higher Secondary School, Serchhip tana BNRGSK Hall, Serchhip-a neih a hmanpuina ah District Bawrhsap Kumar Abhishek chuan Vote thlak pawimawhna sawiin, ram hruaitu tha thlang tura vote thlak chu mitin mawhphurhna, democracy bulthut pawimawh a nih thu a sawi a, kum tling tharte chu Electoral Roll a inziaklut ngei tura chahin, Vawiin-a zirlai naupangte chu hmalam hun lo awm tura Mizoram innghahna an la ni dawn tih hrereng turin a chah a. “Mipuiten lang tlang taka kan aiawha roreltu kan thlang thin hi a hlu em em a, he kalphung hlu leh zahawm tak hi vote thlak thintu mipuiten kan ngaihhlut zel a pawimawh a ni,” a ti a ni.

Electoral Literacy Club (ELC) Meeting hi chawhma lamah Brilliant Higher Secondary School-ah neih niin he hun hmanpuitu Addl. DC Lalmuansanga Ralte chuan zirlaite chu ram nghahfak an ni tih sawiin, “In lehkha zir chhung a rei tawh dawn lova, chuvang chuan theihtawp chhuaha bei turin ka ngen cheu a ni,” a ti a. Ram hruaitu tur thlang thin ram kan nih avangin mipuiten kan thlan turte kan hriat chian a pawimawh thin a, an thu ken leh an Party Manifesto te, mipui kaihhruai an tum dante leh an thil tumte kan hriatsak a ngai a, chung thilte chu zirlai kan nih lai atang hian ngaihtuahna kan sen a ngai a ni, tiin chuvang chuan chutiang thil inhrilhriatna atan he hun hi buatsaih a ni tih a sawi a. “Khua leh tui dik tak kan nih angin Electoral Roll-ah kan inthun ngei tur a ni a, inthlanna a lo awmin kan aiawha kum 5 chhung atana roreltu turte kan thlang dawn a ni tih hre chungin vote kan thlak ngei thin tur a ni. Mipuiten kan duhzawng ngei ram hruaitu kan thlan hian ram inrelbawlna thianghlim leh langtlang atan hna tha tak kan thawk tihna a ni,” tiin Electoral Roll-a inthun ngei tur leh inthlannaa vote thlak ngei thin turin zirlaite a chah a ni.

Nimin-a heng hun hmanna ah te hian Serchhip DC Office-a Election Officer Lalrinchhani Ralte chuan Democracy ramah chuan mipuiten kan aiawh kan thlang thin tih sawiin, chumi tithei tur chuan Electoral Roll-ah in ziahluh a ngai a, India khua leh tui, kum 18 tling chin chu mahni awmna Part-ah theuh BLO te kaltlangin kan inziaklut tur a ni, a ti a. Election Commision of India chuan Electoral Roll-a awm thei te inziahluh hi a ngaipawimawh em em tih pawh sawiin, kumin ah pawh November 1, 2021 khan Draft Electoral Roll tarchhuah tawh niin, January 1, 2022-a kum 18 tling tur chin, Roll-a la inziaklut lo kan awm chuan inziah luh vek tur a ni, a ti a. Vote an neih hunah pawh vote thlak lo ngaipawimawh hram turin kalkhawmte a chah bawk.

Comments

Chhiar Hlawhte

Book of the Year hlan