Latest News

KEIMAHNI

MJA Serchhip District Member ten Vawiin leh naktuk ah Thingdawl-a Horticulture Department hmalakna leh Rel kawng siam mek te an tlawh dawn avangin naktuk leh naktip-ah te LENKAWL a rawn chhuak thei dawn lo a, mipuite hriatthiamna kan ngen e.

C&I Minister in Bamboo Processing Factory leh Common Facility Centre a hawng

Commerce & Industries Department changtu Minister Dr R. Lalthangliana chuan nimin khan Zuangtui Industrial Estate-ah Bamboo Processing Factory leh Common Facility Centre a hawng.

Commerce & Industries Minister Dr. R. Lalthangliana chuan Mizoram-in kan ram economy chawikang tura kan intodelh ber pakhat chu Mau a ni tih sawiin, sawrkar pawhin kan ngai pawimawh hle a ni, a ti a. Hetiang a kan ram Mau ngei hmanga eizawnna ngelnghet thalai te tana din a ni chu lawmawm a tih thu sawiin, kan ram-ah Mau a tha duh a, Mu phurhchhuahna tur Link Road tha kan neih a pawimawh avangin Chief Minister Zoramthanga’n a vei em em a, sawrkar laipui lamah a bawhzui mek a ni, a ti a. Mizoram sawrkarin Industrial Growth Centre, Sakawrtuichhun-a a din chu a nihna tur ang taka kan hman tangkai theih nan uluk takin ruahmanna felfai tak siam a ngai tih a sawi bawk.

Nimin-a hawn tak Bamboo Processing Factory hi Agarbati kuang (Agarbati stick) siamna tur niin Common Facility Centre hi Zuangtui Industrial Estate-a Handloom Weavers te’n an hmang dawn a. Bamboo Processing Factory hi Bamboo Development Agency-in National Bamboo Mission hnuaiah cheng nuai 60 seng-a a din niin, kum 2020 September thla a sak tan a ni a. Round Agarbatti Stick size hrang hrang siamchhuahna hmun tur a ni a, thla khatah round Agarbatti stick 10.40 tonnes siamchhuak thei tura duan niin, heng an siamchhuah zawng zawng hi khawvela Agarbatti siamtu Company lian ber, Ranga Rao & Son, Mysore te'n an lei vek zel dawn a ni. Ranga Rao & Son Company mi leh sa te pawhin a hmunah rawn kalchilhin, he Unit atanga product awm te an endik hnuah tha tawkah an ngai a. He Unit-ah hian Agarbatti siamna khawl 8 dah a ni a, Round Agarbatti siamna atanga hnawmhnawk (waste) tlingkhawm te hmang tangkai turin Bamboo Charcoal & Vinegar Unit siam tel a ni a, he unit hi Zero Waste nitura duan a ni.

Minister in a hawn Common Facility Centre hi Bamboo Development Agency in a din ni bawkin Zuangtui Industrial Estate-a Handloom Weavers te'n an hman tangkai tur leh Handloom Textile & Handicraft Wing, Directorate of Commerce & Industries Department-in a enkawl chhunzawm tur a ni a, man tlawm zawkin La hlumin puan pawh ban theih a ni dawn a ni.

Comments

Popular News (Last 30 Days)