December thla ah Zofate Haw runpui neih tum a ni

Zoram Thar chuan ‘Zofate Haw Runpui/Hnam Inkhawmpui Thianghlim’ chu December 16-18, 2021 chhunga neih turin an rel.

Zoram Thar Zofate Lairelna Inpui chuan nimin khan Aizawl Press Club-ah thuthar thehdarhtute kawmin ‘Zofate Haw Runpui/Hnam Inkhawmpui Thianghlim’ hi December 16-18, 2021 chhung khian Zofate Pathian Biak Inpui hmun, Kanan Phaipui, Thenzawl-ah neih turin an tifel tih an sawi a, “He hun pawimawh takah hian kum tam tak thendarh leh awpbehna hnuaia awm Zofate hnam khat kan nihna puan tur a ni ang,” an ti.

Zofate hi thlah khat bul thuhmun atanga lo chhuak vek kan nih nemnghehna Lung - Zofate Hnam Lungphun hawn a nih dawn thu leh he lungphun ah hian Zo hnahthlak chi peng hming zawng zawng a chuang kim vek ang tih an sawi a. “Hnam chipeng lung hrang hrang chu hnam aiawh Khual Zahawm ten an hawng ang a, thu an sawi bawk ang. Hnam chi peng tin aiawh ten inpumkhatna Jubilee dar an vaw bawk ang. Inkhawmpui thupui chu ‘I thovang u khai I din teh tak ang u’ tih a ni,” tiin thupui hi Rev. Dr. Zaichhawna Hlawndo leh Upa C. Zairemmawia ten an sawi tur thu an sawi bawk.

He hun hman turah hian Hnam lam leh zai te a awm dawn a, Mizoram pawn atanga Khual Zahawm te leh Mizoram chhunga NGO hruaituten thu an sawi bawk ang. Inkhawmpui tawpni ah khawvela Biakin lian ber tur Zofate Pathian Biak Inpui lungphum phum tur niin Zofa a duh apiang Hnam Palai-a tel turin an sawm bawk a ni.