Serchhip Mat Phai Zawlpui zau-ah ‘Khawl hmanga Buh seng runpui’ neih a ni

Serchhip Mat phai Zawlpui zau Leilet-ah 'Khawl hmanga Buh seng runpui' chu nimin khan neih niin he hun hi Agriculture Minister C. Lalrinsanga leh Bialtu MLA Lalduhoma te chuan an hmanpui a, Agriculture Minister chuan Zawlpui zau-a bul lo tantute thawhrimna leh tumruhna fakin, an zarah Buh tharna hmun zau tak kan lo nei ta a ni, a ti.

Zawlpui zau-a 'Khawl hmanga Buh seng runpui' nimin a neih ah hian Zawlpui FMC Vice President, Kapthianga Serchhip Chhim Veng te Buh chu Minister leh Bialtu MLA te hian khawl hmanga sengin hemi hnu hian Aizawl Zonuam-a Sangzuala'n Buh herna khawl a siam, 'Zo Fasuar BVK' tia a hming an vuah hmangin Buh hi vuak leh nghal a ni a, he khawl hi kumin a siam niin a siamtu hian a enchhinna atan Serchhip Zawlpui phai-ah hian pahnih rawn dahin heta an enchhinna atang hian a aia tha zawka siamin zawrhchhuah theih tura la siam an tum thu a sawi a ni.

Leilet-a Buh seng a nih hnu hian a lawmna chu neih chhunzawm nghal a ni a, he hun hi Agriculture Department-a Addl. Director James Lalsiamliana chuan kaihruaiin Agriculture Minister C. Lalrinsanga chuan loneituten hlawk taka an Lo te an enkawl theih nan nasa zawka khawl hman (farm mechanisation) chu sawrkarin a ngai pawimawh hle tih a sawi a, Sub-Mission on Agriculture Mechanisation (SMAM) hmalakna pawh a lian chho zel tih sawiin, Custom Hiring Centre hmanga Tractor an semte pawh a dawngtuten tangkai taka an hman an beisei thu a sawi.

Agriculture Minister sawrkar hmalakna te sawiin, Fur tui lianin leilet a tihchhiat thinte pawh zirchiana, a invenna lam pawh kan ngaihtuah chho zel turah ngai ila, chutiang bawkin a chhung inkalpawhna pawh kan umzui zel dawn a, Chawmkai leh Thinglubul zau inkar kawng pawh FOCUS hmalaknain kawng (rigid pavement) siam tum mek a ni a, hmun dangte pawh lung phah tura ruahmanna siam mek a ni, a ti a.Leilet bial chhung siam rem hnate leh Zawlpui leh a chhehvel zau hrang hranga Electric eng pek darh zau hnate pawh bialtu MLA te nena inbe zel chungin kan thawk zel dawn a ni, a ti bawk. Heng bakah hian Ni zung chakna hmanga tui pump khawl Unit 200 zet tunah hian pek chhuah tan mek a nih thu te, Zawlpui leh a chhehvel zau te tan Lo lu lama tui dahkhawlna (Over head Tank) 11 FOCUS atanga siam tum a nih thu a sawi bawk.

He hunah hian Khual zahawm Serchhip Bialtu MLA Lalduhoma chuan he hun rawn hmanpuitu Agriculture Minister chungah lawmthu sawiin, Minister a nih tirh ah a sawm angin Zawlpui Zau hi an lo fan tawh thu a sawi a. Lumtui tuikhuah thalo siamthatna atan hma a lo lak tawh thu leh he tuikhuah hi rin reng theih a nih dawn loh avangin tun Thal chhunga siamthat an beisei thu a sawi a, Tui dinhmun zirin a chhak deuha khuapin tuna la hman tangkai loh ram te pawh hman tangkai theih a nih a beisei tih a sawi bawk.

Serchhip Bialtu MLA chuan tunhnaia Mat phai a tuilian vanga harsatna thleng chu Mat lui lian ai mahin Tuichar lui, Zawlpui phai a thlen hnua luanna mumal neilo in a thlen te an nih thu a sawi a. Hemi chungchang hi Department lam pawhin ngaihtuah sak thei se a duh thu a sawi a. Zawlpui phai Chamdur leh Vaivenga Zau inkar Mat lui, Thir Lei dawh chhe tawh tak chu MLA Fund hmangin Hume Pipe dahin lirthei kaltlang theih tura siam a ni dawn tih a sawi bawk.

He hunah hian Serchhip District Bawrh-sap Kumar Abhishek pawhin Zawlpui leh a chhehvela khawl hmanga buh seng runpui neih a ni chu lawmawm a tih thu a sawi a. Serchhip Mat phai-a Zawlpui zau hi hectares 125-a zau niin In 56 ten Leilet an nei a, kum 1945 atang khan Leilet siam tur hian bul lo tan tawhin chhan hrang hrang avanga harsatna an tawh hnuah kum 1951 atang khan Leilet hi a ngheta neih tan a ni a, nikum (2020) khan buh phur 5131 (Tin 15,393) an thar a. Buh bakah hian thlai chi hrang hrang chin thin a ni bawk.