Latest News

Chanchin thar thenkhat :

Chief Minister in mi pawimawh te kawm chhunzawm

New Delhi-a cham mek Mizoram Chief Minister Zoramthanga chuan sawrkar mi pawimawh hrang hrangte a kawm chhunzawm zel. Chief Minister hian nimin khan Union Home Secretary Ajay Bhalla leh Intelligence Bureau Director Arvind Kumar te chu an Pisa-ah ve ve hmuin, thu pawimawh tak tak an sawiho a. India-German Water Partnership hruaitute nen Mizoram House Conference Hall, Chanakyapuri-ah inkawmin, Aizawl Water Distribution System chungchang te sawiin, Mizoram dinhmun leh ruahtui khawl chungchangte an sawiho bawk. Hei bakah hian Power Finance Corporation Ltd. Project Director-te Mizoram House Conference Hall-ah vek kawmin Mizoram-a kawlphetha hnianghnar zawka a awm theih dan tur kawng dap theih dan chungchang an sawiho bawk a ni.


SHC-ah CEM thar lalut

Sinlung Hills Council-a Chief Executive Member thar atan Biaknunga chu nimin khan Aizawl DC Dr. Lalhriatzuali Ralte chuan rinawmna thu tiam tirin a lalut. Sinlung Hills Council-a CEM Lalthlamuana Hmar chuan tun thla ni 10 khan banna thehlutin tun thla ni 23-a Sinlung Hills Council General Council Meeting-ah Biak-nunga, 12-Saiphai Council Constituency chu chuhtu awm lovin CEM-ah hian thlantlin a ni a, sawrkar in a pawm hnuah nimin khan Sinlung Hills Council Chief Executive Member atan lakluh a ni. Biaknunga hi SHC Interim Term Council-ah khan Deputy Chairman niin HPC leh MNF thawh-hona Council-ah Deputy Chairman a ni bawk.


Governor in Siaha tlawh tum

Mizoram Governor Dr. Hari Babu Kam-bhampati chuan thla thar Dec. 2 khian zan khat riakin Siaha leh Chawngte tlawh a tum a, nimin khan Siaha-ah Governor lo dawnsawn dan tur hi Bawrhsap Kesavan R hova sawiho niin a hun hman dan tur te thlirho a ni bawk.


Scholarship lut tan mek

MZP General Hqrs. chuan Post Matric Tribal Scholarship 2nd Installment chu zirlaite hnenah an Bank Account kaltlanga sem mek a ni tih nimin khan sawiin, Scholarship 2nd Installment dawng tur mi 17,303 zingah nimin tlai dar 4:20 thleng khan mi 522 te Account-ah thun a nih tawh thu leh thun chhunzawm zel a ni tih an sawi a. Scholarship dawng tur zirlaite chu mahni Account lo enfel turin an chah bawk a ni.


ASF ziaawm chho mek zel

African Swine Fever (ASF) vanga Vawk thi chu Mizoram-ah a tlem chho tawh viau a, nimin khan Mizoram pumah ASF vanga Vawk thi pathum awmin Lunglei District ami te vek a ni a, heng te nen hian Mizoram pumah ASF vang hian Vawk 29,779 a thi tawh a, Vawk 10,380 suat a ni tawh bawk. Serchhip District ah pawh ni thum chhung ASF vanga Vawk thi chhinchhiah a awm belh tawh lo a ni.

Comments

Popular News (Last 30 Days)