District Level Coordination Committee on FOCUS in an hmalakna thlirletna hun an hmang

Nimin khan Serchhip-ah District Level Coordination Committee on FOCUS (Fostering Climate Resilient Upland Farming System) chu thukhawmin an hmalakna hrang hrangte an thlirlet a, he hun hi Aizawl lam atangin Mid-Term Review Monitoring Team ten an rawn tel pui bawk a ni.

Serchhip DC Meeting Hall-a District Level Coordination Committee on FOCUS in Mid-Term Review Meeting an neih hi an Chairman leh District Bawrhsap Kumar Abhishek IAS chuan kaihruaiin thutkhawmna a tel tura rawn kal International Fund for Agricultural Development (IFAD) Monitoring Team te, Nagaland PMU aiawhte leh Aizawl PMU aiawhte chungah lawmthu a sawi a. Serchhip District-a FOCUS hmalak dan tlangpui tarlangin, FOCUS Serchhip District Management Unit hnuaiah khaw 43 ah hmalakna kalpui a nih thu te, heng te hi Bial (Circle) pathum-a then an nih thu te, khaw tinah Lead Farmer siam an nih thu te leh Farmer Interest Group (FIG) 489 siam a nih tawh thu bakah heng FIG-ah te hian kuthnathawk member 8422 an awm thu te a tarlang a. Line Department te nena thawhhona (convergence) an neih hrang hrangte pawh a tarlang bawk. Hei bakah hian Serchhip District-a FOCUS kalpui a nih hnuah khaw pasarih (7)-a chhungkaw 248 ten kumtin Lo neih bansana huan nghet neia eizawnna an kalpui tawh thu a tarlang bawk a. Kumtin Lo vah bansana eizawnna nghet din chu FOCUS thiltum lian ber pakhat a ni.

He hunah hian Monitoring Team Leader Anton Glaeser pawhin thu sawiin, Serchhip District hmalakna te chu fakawm a tih thu a sawi a. Line Department leh thawktu zawng zawngten FOCUS thiltum te a hlawhtlin theih nana hmalakna awmze nei dap reng tur te, Department dangte nena thawhdunna (Convergence) lama nasa zawka hmalak a tul ziate sawiin, an hmalak zelna turah duhsakna a hlan bawk.

Hemi hnu hian kum 2018 atanga Serchhip District chhunga FOCUS hmalakna hrang hrang, sum leh pai hmanral dan leh hnathawh tawh chinte uluk takin thlirletna an nei zui a, District chhung khaw hrang hrang atanga lokal Lead Farmer te leh Farmers Interest Group hruaitute nen FOCUS hmanga hnathawh tawh chinte uluk takin an sawiho bawk a ni.

He Meeting-ah hian District Level Coordination Committee member te, IFAD Monitoring Team te, Project Management Unit, Mizoram leh Nagaland aiawhte, Line Department aiawhte leh khaw tina Lead Farmer leh FIG aiawh hruaitute an tel a ni.

Comments

Popular News (Last 30 Days)

Vawiin-ah HSSLC Exam result

LPG man bithliah thar