Chanchin thar thenkhat :

State pahnih CM te inkawm

Union Home Minister Amit Shah hovin nimin nimin tlai khan Mizoram Chief Minister Zoram-thanga leh Assam Chief Minister Himanta Biswa Sarma te chu Union Home Minister chenna In ah an inkawm. He inkawmna ah hian thildang tam tak an sawi zingah ramri chungchang sawi telin, dawhkan khat kîl a, harsatna leh buaina tello a sawifel ngei nise an ti a. CM leh CM Level ah a ni emaw, State pahnih ten Delegation Team insiam ve ve emaw pawhin State pahnihte hi inbiak ni thin se, an ti a. Boruak tha thei ang ber siam nise an ti bawk. Hemi hma nizan hmasa khan State pahnih Chief Minister te hi New Delhi a Assam House, Chanakyapuri-ah inkawmin State pahnih tana hmasawnna tur thil hrang hrang an sawi a. Mizoram Chief Minister chuan Hachhek tlangdunga kuhva hring tharchhuah, a hralhna lama Patharkandi District-a bial thuneitu thenkhatin Myanmar atanga lo lut ni a an ngaih avanga an lo hnar sak thin chungchang pawh a sawichhuak a ni.

GMN in pawi tih thu an sawi

Green Mizoram Network (GMN) chuan nimin khan Tam Dil-ah General Body Meeting neiin Mizoram lui 16 kamtuak ramngaw (Riverine Reserved Forests), The Mizo District (Forest) Act, 1955 hmanga humhalhna Dan kum 65 chhung zet kan lo hman tawh chu January 27, 2021 khan Gauhati High Court (Aizawl Bench) chuan a hnawl tih sawiin, pawi an tih thu an sawi a. Gauhati High Court thutlukna dodal a hemi kawnga hmala mektu mimal leh tlawmngai pawl te an thlawp thu an sawi bawk. GMN chuan The Mizo District (Forest) Act, 1955 hmanga hum-halh hi a vaiin 1,832.50 Sq.km niin hei hi Buh Tin 4,58,125 hmun zet-a zau niin an sawi bawk.

SHC-ah sawrkar siamrem

Sinlung Hills Council-ah Chief Executive Member atana Biaknunga lakluh a nih hnuah Deputy Chairman atan Vanlalsiamsanga, Phuaibuang bialtu chu niminpiah khan lakluh niin nimin khan Executive Member atan mi 4 lakluh leh an ni.

Mizoram-ah lir a nghing

Nimin zing khawvar hnu lawk khan lir nghing na takin Mizoram leh a chhehvel sawiin vanneih-thlak takin chhiatna liantham a thlen erawh hriat a ni lo. Ministry of Earth Sciences hnuaia National Centre for Seismology-in report a pek danah chuan lirnghing nat zawng hi magnitude 6.1 niin zing dar 5:15-ah Mizoram bakah India hmarchhak leh Myanmar leh Bangladesh ah te pawh lirnghing hi hriat a ni. Lirnghing hian Serchhip District-ah chhiatna lian a thlen hriat ni lo mah se Lungkawlh leh Sialhau khua ah te building thenkhat bang a khik thu report dawn a ni thung.

ABC Inkhawmpui neih a ni

Baptist Church of Mizoram (BCM) hnuaia rorelna sang ber dawttu, Area Baptist Council (ABC) inkhawmpui chu nimin atang khan hmun hrang hranga ABC 15-ah neih tan a ni a, naktuk Pathianni thleng neih a ni ang. Kumin hian hri leng avangin kumdang angin hun hman theih ni lo mah se ABC tam berah chuan Vawiin hian rorelna hun hmangin naktuk Pathianni ah Kohhran Upa nemnghehna leh Sacrament inkhawm te neih a ni anga, kumin hian Kohhran Upa a nemngheh tur mi 95 an awm a ni. Serchhip ABC inkhawmpui pawh Pangzawl BCM Biak In-ah neih a ni dawn a ni.

National Pharmacy Week

National Pharmacy Week vawi 60-na pualin Mizoram Pharmacists’ Association chuan nimin khan Aizawl-a Synod Conference Centre-ah hun hmangin Hospital & Medical Education-a Director, Dr. T. Lalhmangaihi chuan he hun hi a hmanpui a, he hunah hian kumin a thupui tura thlan ‘Pharmacist : An integral Part of Healthcare’ tih thupui hmangin Dr. Lalhmangaihsanga Renthlei, Doctor of Pharmacy chuan kalkhawm te zirtirna a pe a ni.