Latest News

Khaw pahnih hmun khuahkhirh bikah puan an ni

Serchhip District Bawrhsap Kumar Abhishek IAS chuan tunhnaia Serchhip District chhunga COVID-19 hri kai hmuhchhuah tamna Leng khua leh Chekawn khua te chu COVID-19 hri darh zel thei dinhmunah a ding nia a lan avangin hmun khuahkhirh bik (Restricted Area) atan a puang a. Chekawn khua ah hian tunhnaiah hri kai mi 20 lai hmuhchhuah ni tawhin enkawl dam an awm chho tan mek a, Leng khua ah hian hri kai mi 52 hmuh ni tawhin enkawl dam an la awm lova, hri kai te enkawlna atan hian 4C pahnih siam a ni bawk.

Chanchin thar thenkhat :

Hmalakna tichhe turin ti

Chalfilh tlangchhip-a khualzinte chawlh hahdamna hmun tur, Tourist Destination-a Mizo-ram sawrkarin building a lo sak tawh zawng zawngte thiat vek turin National Green Tribunal Eastern Zone Bench-in thupek a siam a, nakum January ni 7-ah sawrkar hmalak dan a ngaihtuah leh ang. Chalfilh tlangchhipa Vanzau-ah hian Forest Clearance engmah nei lovin kum 2006-2007 atang khan Ministry of Tourism atanga sum hmuh hmangin Mizoram sawrkar chuan Chalfilh Tourist destination Phase I leh Phase II a kalpui a, Phase I atan hian December ni 5, 2006 khan cheng nuai 499 hmuh niin Phase II atan September ni 31, 2013 khan cheng nuai 500 hmuh leh a ni a, Phase II sum hmuh tur erawh 20% chauh Mizoram sorkarin a dawng hman thung a ni.

Tourism Department in Chalfilh tlang-a Tourist Destination Project a kalpuina hmun hi July ni 13, 1976 khan  Notified Reserve Forest Area-ah puan a lo ni tawh a, heti chung hian Forest Clearance dil leh nei hmasa lovin hmalakna hi kalpui a ni. National Green Tribunal chuan he Project kalpuina atana building leh thildang sak te chu thla khat chhunga thiat tur leh an hma-lakna te chu Thlalak nena thehlut turin a ti a ni.


Vawiin a Scho sem phut

Mizo Students’ Union (MSU) General Hqrs. chuan sawrkar laipui, Ministry of Tribal Affairs atanga kum 2020-21 Post Matric Tribal Scholarship to ST sem hmabak 2nd Installment, Nov. 2, 2021-a an lo thun tawh Zirlaite Bank Account a thun a la ni thei lo leh Finance Department a hun rei tak file tih khawmuan a ni chu hriatthiam har an tih thu sawiin, Mizoram sawrkar in zirlai te a ngaihsak tawk lohna ah an ngaih thu an sawi a. Scholarship hi Vawiin, Nov. 22, 2021 ralhma ngeia Zirlaite Bank Account-a semchhuak tura sawrkar chu phutin, an huntiam ralhma a zirlai ten an dawng lo a nih chuan zirlaite'n an chanvo dik tak an hmuh theihna turin a tul dan ang zela che chhuak thei tura lo inring turin an in ngen bawk.


Tribal Certificate siam mak ti

BJP Mizoram Pradesh Thalaite chuan Lengpui Airport Renovation neih mekah Contractor atan Kamrul Uddin hmanrua a an hman duh vanga ‘Kam-lova Chhangte’ ti a Tribal Certificate an siam sak chu a mak an tih thu Inrinni khan thuchhuah siamin an tarlang a. Kamrul Uddin-a'n Tribal Certificate a neih theihna tura a pa anga lo tang leh amah Sponsor tu pawh demawm an tih thu sawiin, hetiang thil diklo lutuk, Mizo hnam hralhna ang hial a thil lang leh hna lian a thawhna tur a ruahman sak a ni chu Mizoram mipui ngaihnepna leh NGO te ngaih-nepna lian takah an ngaih thu an sawi bawk.


Rabung khua ah In 1 kang

Zirtawpni chawhnu lam khan Khawzawl District-a Rabung khua ah V. Lalhmingliana In luahlai chu a kang a, mi tlawmngai ten thelh mah se bungrua tlem tihloh chu chuh hman lohin a kangral vek a ni. He In-ah hian In neitute nupa bakah an fate pathum khawsa in pawn lama an awmlai a nih avangin mihring thi leh hliam an awm lo a ni. Kangmei tuar te hi Inrinni khan State Disaster Response Fund (SDRF) kaltlangin Rs. 1,01,900/- hlan niin hnatlang te thingpui lumna atan Rs. 2000/- hlan an ni bawk.

Comments

Chhiar Hlawhte

Book of the Year hlan