Chanhcin thar thenkhat :

MZP in hnathawh enzui dawn

Mizo Zirlai Pawl (MZP) General Hqrs. chuan nimin khan Aizawl-a MZP Pisa Pui-ah MZP Executive Committee thutkhawm neiin NABARD sum hmanga School Education Department-in School building thahnem tak a sak that chungchang ah thil diklo leh felfai tawk lo awmin an hriat thu an sawi a. A nih dan tur dik tak a nih leh nih loh te enchianga chhuichiang turin an President Lalnunmawia Pautu hona hnuaiah Committee din nghal a ni a, MZP Hqrs., Sub-Hqrs. leh Branch hrang hrangte chu an huamchhunga hnathawhte endik a, kar khat chhunga MZP General Hqrs. ah report thehlut hman tura tiin zirlaiten an dikna chanvo an chan theih nan uluk taka chhuiin a enzui zel anga, a tul angin hma a la zel dawn tih an sawi bawk. Hei bakah hian Zirlaite chanpual Scholarship 2nd installment sem mai theih tawh thu Mizoram sawrkar kutah hun rei tak tih khaw-tlai nia a lan avangin Nov. 24, 2021 tlai dar 4:00 thlenga zirlaite Account a thlen loh chuan lungawilohna an lantir sawn tih an sawi bawk.

FMGE&W in pawi tih thu sawi

Federation of Mizoram Government Emloyees & Workers (FMGE&W) chuan tunhnaia Mizo-ram Sawrkar hnathawkten a hun taka hlawh an lak theih loh avang leh Dearness Allowance (DA) chungchangah Sawrkarin an chanvo a pe mai lo chu pawi an tih thu sawiin, hlawh an lak tlai hian mi tam tak khawsak a buai phah thin thu leh a hun taka loan an lak te an rulh theih thin loh avangin pawisa tam an chawi a ngai thin tih an sawi a. DA pawh Rules anga pe ve thuai tura sawrkar ngenin, an chanvo an hmuh theih nan a tul angin hmalak zel an tum thu an sawi bawk.

Scho tur pekchhuah ah lawm

Mizo Students’ Union (MSU) General Hqrs. chuan kum 2020-2021 atana Post Matric Scholarship to Scheduled Tribe sem tur chu nimin khan Aizawl North Treasury-ah release Order tihchhuah a ni tih sawiin, lawmawm an tih thu thuchhuah siamin an tarlang a. MSU chuan kum dang aia zirlaite’n scholarship an hmu har chu pawi an tih thu leh Session tharah chuan a hun taka zirlaite’n an chanvo an hmuh theih nan kan State sawrkar chu theihtawp chhuaha zirlaite ngai pawimawh lehzual turin an ngen bawk.

Inthlanna neih hun tur puang

Mizoram State Election Commission chuan AMC huamchhunga Local Council 5-a Seat ruak te,  Mara Autonomous District Council hnuaia Village Council 7-a Seat ruak 14 awm te, Lai Autonomous District Council-a Village Council pali leh Chakma Autonomous District Council a Village Council 6-a Seat ruak awm te hnawhkhat tura inthlanna chu Dec. 16, 2021 khian neih tur a ni tih a puang a, heng inthlanna chuh tumte tan hian tun thla ni 29 thleng hming pekluhna hun pawh hawn nghal a ni bawk.

ICFAI Convocation nei

ICFAI University, Mizoram Convocation vawi 9-na chu nimin khan ICFAI University Campus, Durtlang North-ah neih niin Higher & Technical Education Minister Dr. R. Lal-thangliana chuan khuallian niin a hmanpui a, he hunah hian kum 2020-2021 chhunga ICFAI University, Mizoram atanga Under Graduate leh Post Graduate zir chhuak mi 333 te hnenah Degree hlan niin zirlai titha zual te hnenah Gold leh Silver Medal sem a ni bawk. ICFAI University hi Assembly Dan pass hnuaia din a ni.

Lok Sabha MP in Mizoram-a BSNL hotute a kawm

Mizoram Lok Sabha MP C. Lalrosanga chuan nimin khan Aizawl-a BSNL hmun tlawhin General Manager Arun Kumar leh a thawhpui ten an lo dawngsawng a, thil pawimawh hrang hrang, Mizoram chhunga BSNL hnuaia inbiak-pawhna lam tihthat dan turte a sawipui. He an inkawmna ah hian BSNL General Manager chuan 4G khawl thar an neih thuai tur thu sawiin, hei hian inbiakpawhna lam a tihthat tur thu leh BSNL hian FTTH hmangtu pawh 8300 lai an nei tawh tih a sawi a. Internet tihchangtlunna tura Bang-ladesh atanga Internet Gate Way/Internet Traffic hrui pawh hna zawh tawh chu tunah hian enchhin mek a ni tih MP chu a hrilh bawk.

He hunah hian Lok Sabha MP C. Lalro-sanga chuan BSNL kaltlanga Mizorama inbiak-hmuhna lam tichangtlung tura Mizorama BSNL hotute mamawhte chu an hmunpui lama hotute hnenah thlensak a tum thu a hrilh bawk a ni.

Hemi hnu hian MP C. Lalrosanga hian Assam Rifles DIG Brigadier Digvijay Sing chu kawmin, Aizawl atanga Assam Rifles sawnchhuah dan tur thute leh Myanmar nena inrina hrula Assam Rifles hote hnathawh dante a sawipui bawk.

Pangpar tiak siam semchhuak

ICAR-Indian Institute of Horticulture Research (IIHR), Bengaluru leh ATMA, Aizawl District, Agriculture Department tangkawp ten Tissue culture atanga an siam chhuah pangpar tiak, Gerbera seedlings chu nimin khan Aizawl atangin semchhuah a ni a, Gerbera pangpar tiak hi Tlang-nuam block, Darlawn Block leh Aibawk Block hnuaia pangpar chingtute hnena semchhuah a ni. Nimin-a he hun hman hi Agriculture Director Rohmingthanga Colney chuan hmanpuiin pangpar chingtute chu tha taka ching punga, ICAR-IIHR leh Department duh ang ngei a an sum lakuh tihpun nana hmang turin a chah a ni.