Tuilian in Mat phai-a harsatna a thlen te a hmunah Bialtu MLA in a tlawh

Tunhnaia ruahsur nasa avanga Mat lui leh a fintu kawr lui lian in Serchhip Mat phai-a Buh leh thlai chinna hmun a tihchhiat te chu Inrinni khan Serchhip bialtu MLA Lalduhoma chuan a hmunah a tlawh.

Serchhip biatu MLA hian tuilian avanga harsatna tawk Leilet neitute leh Thlasik thlai hmun neitute chu an hnathawhna ah tlawhin an harsatna tawh te an lo hrilh bakah Nul neitute chuan tui a len avanga thlai chi thlak that leh ngai turah thlai chi-ah harsatna an tawh thu te an lo thlen a, MLA chuan an harsatna tawh ah te a theih anga hma a lo lak pui tur thu a sawi a ni. 

Serchhip bialtu MLA chuan tuilian in a chim leh a tihchhiat tuartu in-report chu mi 47 an nih tawh thu sawiin, in report lo te la awm theih a nih avangin mi 50 zen zawn ni turah an ngai tih a sawi a, heng mite chhawmdawlna hi sawrkar in a ti turah an ngaih thu leh amaherawh chu a Department changtu, Horticulture Department chuan a tih theih dawnloh thu leh DM&R-ah thlen lehchhawn tur a ni dawn tih a sawi a. Tun hnaivai-a an mamawh tur chu Zikhlum chi a ni dawn tih pawh sawiin, hemi chungchang hi Serchhip a rawn kal hma hian sawrkar thuneitute nen pawh an sawiho thu leh sum dinhmun te thlirin a rang thei ang bera pek a nih loh chuan a Season a ral mai dawn avangin Department lamin an tih theih dawn leh dawnloh ni 2/3 an ngaichang anga, an ti thei dawnlo a nih erawh chuan Bialtu MLA a nihna angin an tihsak dawn tih a sawi a. Sawrkar pawhin Rehabilitation bakah tuna eizawnna bul an tan leh theihna tura a chi pek te a ngaihtuah theih turah a ngaih thu a sawi bawk. Thlasik thlai chingtute bakah hian Buh chingtute pawhin harsatna an tawh thu hi bialtu MLA chuan sawin, tunah hian an buh seng tawh thenkhat te chu a to tawh tih a sawi a. Tunhnaia ruahsur chuan Serchhip Mat phai chauh ni lovin Mizoram hmun hrang hrangah buh te a tichhe nasa em em tih sawiin, Scheme lian tham takin sawrkar in hma a lak te an beisei phawt dawn tih a sawi bawk.

Serchhip bialtu MLA hian Chawm kai atangin, Chamdur Zau, Vaivenga Zau, Tinglubul Zau leh Zawlpui buh hmun thlengin ke in a fang a, leilet neitute awm remchang apianga tlawhin a kawm a; helai Mat phai ruama tui lakna tur tha deuh te, kalkawng (link road) siamna tur tha leh remchang te leh Mat lui dai kaina tur remchang turte a thlithlai nghal bawk a, Serchhip-a ZPM hruaitu ten bialtu MLA hi an tawiawm a ni.