Latest News

KEIMAHNI

MJA Serchhip District Member ten Vawiin leh naktuk ah Thingdawl-a Horticulture Department hmalakna leh Rel kawng siam mek te an tlawh dawn avangin naktuk leh naktip-ah te LENKAWL a rawn chhuak thei dawn lo a, mipuite hriatthiamna kan ngen e.

Sairang-ah Bamboo Processing Factory hawn a ni

Bamboo Development Agency-in Bamboo Technology Park, Sairang-a Bamboo Processing Factory an din chu nimin khan Commerce & Industry Department changtu Minister Dr. R. Lalthangliana chuan a hawng.

Bamboo Processing Factory hawnna hunah hian Dr. R. Lalthangliana chuan an thil hawn chu thil ropui tak ni lo mah se thil hlu leh tangkai tak a ni tih sawiin, kum hnih dawn lai Covid-in min tihbuai hnuah, an che ve thei tan dawn ta tih a sawi a. Mizoram anga ram vannei dang hi an vang viau-a a rin thu pawh sawiin, “Ram dang angin Vurin min tibuai ve lo a, sik leh sa thu ah harsatna kan tawk ve lo a, kan ram hausakna Pathian in min pek hi a turu a ni. Thil tha leh hlu tam a awm laiin, Mau bik hi chu Mizoram tan a potential a ni, sum tam sen a ngai lo a, Micro-Industry kan eizawnna atana tha tak tur a ni,” a ti a. “Mau hi thil thang chak tak, kum khata mihring chena thang thei a ni a, kum 4/5-a ei tling thei a ni a. Mizote chuan thar rang chi hi kan duh dan a ni. Mau technology hi a ropui teh chiam lo na a, a marketing lamah harsatna erawh kan tawk dawn lo a ni,” a ti bawk.

Nimin-a Bamboo Processing Factory hawnna hunah hian National Bamboo Mission-a Mission Director Dr. Elizabeth Saipari chuan Mau hman tangkai dan zirchiang tura India ram State hrang hrang leh India ram pawn thlenga an fehchhuah thu sawiin, kum 2019 atang khan Horticulture Department chuan Environment, Forests & Climate Change Department atang Bamboo Plantation an lakchhawn thu a sawi a. Tunah hian ram hectare 700 chuanga zau ah Mau chi tha ‘Brandisii’ leh ‘Rawmi’ an ching mek a, heng bakah hian kan Mau neihsa te hman tangkai dan tur an zir zel tih a sawi bawk.

Nimin-a hawn tak Bamboo Processing Factory hi National Bamboo Mission atangin cheng nuai 125 hmanga din niin, Round Agarbatti Stick Unit 5 bakah, Bamboo Charcoal & Vinegar leh Bamboo Seasoning Chamber-te dah an ni a. Unit tinah hian Cross Cutting Machine 5, Manual Splitting Machine 9, Slicing Machine 10, Round Stick Making Machine 20, Polishing Machine 6, Stick sizing Machine 5 leh Blade Sharpening Machine 2 a awm a ni. Heng Unit-te hian thla khatah Round Agarbatti Stick 25 tonnes (Truck trip 2) an siamchhuak thei dawn a ni. Agarbatti stick an siam chhuah zawng zawngte hi India rama Agarbatti siam chhuaktu Company lian ber, N. Ranga Rao & Sons-ten man man takin an lei vek zel dawn a. Bamboo Processing Factory hi Zero Waste ni tura duan a niin, Wastages awm zawng zawngte chu Bamboo Charcoal leh Bamboo Vinegar siam nan hman a ni ang. Bamboo Development Agency hian tun dinhmunah Agarbatti sticks Units 9 a din tawh a ni.

Comments

Popular News (Last 30 Days)