Transport Minister in sawrkar mi pawimawh te hmu

Transport Minister TJ. Lalnuntluanga chuan nimin khan Aizawl a Mizo Hnam Run-ah thu sawiin Nov. 22-27, 2021 chhunga Delhi-a mi pawimawh hrang hrang a hmuh chungchang a sawilang.

Transport Minister hian Union Minister of Shipping Sarbananda Sonowal a hmuh thu sawiin, Mizoram-a lui lian kan neihte pangngai taka Lawng kal thei tura siam chungchang a sawipui thu a sawi a. “Khawthlangtuipui - Tuichawng lui siamna tur DPR ( cheng vbc. 22.93) chu Central-in a pawm fel tawh thu min hrilh a. Tender chhuah a nih veleh sum sanction a nih tur thu leh release a nih tur thu min hrilh a ni,” a ti a. Hei bakah hian Tlawng lui chu National Waterway (NW-102) a nih anga hma lak sak tura a ngen thu a sawi a, “Chhimtuipui lui (Darzokai atanga Lomasu) Techno Feasibility Study tura Tender buaipui mek a nih thu ka hrilh a. Hemi atan hian sum mamawh min sanction turin ka ngen bawk a, Minister chuan Tender te tihfel a nih veleh sanction an pek tur thuin min chhang,” a ti.

Chalfilh Tourist Resort-a hmalak tawhna te tichhia a, a hma anga dah leh tura National Green Tribunal-in a tih chungchang chu Standing Councel leh Forest hotute nen Delhi-ah sawiho a nih thu sawiin, Chief Minister duhdan angin National Green Tribunal Order lo chhuah tawh anga an thu awih tho si a, hma lo lak tawhna thiat lo a Order awmsa hi tidanglam tura ngen nise an tih thu a sawi a, “Hemi chungchanga hmala nghal tur hian Siddesh Kotwal, Govt. Advocate, New Delhi chu kan hrilh nghal a ni,” a ti a. Heng bakah hian Law & Justice Minister Kiren Rijiju hnenah Law & Judicial Department-in District Infrastructures (Champhai, Kolasib leh Serchhip)-ah te kan neih thatloh thu a thlen thu te, Union Minister of State (EF&CC Department) Ashwini Kumar Choubey hnenah Forest Department mamawh hrang hrang leh DoNER leh Culture Minister G. Kishan Reddy a hmuh thu te pawh a sawilang bawk.

Comments

Popular News (Last 30 Days)

Serchhip DCSO sawn a ni

Bawngchawm tlang khualbuk rawktu nia hriat mi 2 man