Hri kai sang nga aiin tam ta

Serchhip District-a COVID-19 hri kai hmuh tawh zawng zawng chu mi sang nga aiin an tam ta.

Nimin khan Serchhip District-ah COVID-19 hri kai mi 4 hmuh belh leh awmin heng te hi Sialhau khua ah mi 3 leh Serchhip-ah mi pakhat te an ni a. Hemi hma Inrinni khan Serchhip District-a TrueNat Laboratory atangin hri kai mi pahnih hmuh belh niin Khawtetlang leh AOC Veng ami te an ni a, Rapid Antigen Test hmangin hri kai mi 17 te hmuh ni bawkin an zinga mi 8 te chu Serchhip niin Chhiahtlang-ah 5, Thenzawl-ah 3 leh Keitum khua ah mi pakhat te an ni.

Serchhip District-ah hri kai enkawl te zingah Inrinni khan mi 29 te enkawl dam ni lehin nimin khan mi 50 lai enkawl dam an awm leh bawk a, heti hian nimin thleng khan Serchhip District-a hri kai hmuhchhuah tawh zawng zawng chu 5018 niin an zinga 4627 te chu enkawl dam an ni tawh a, hri kai hmuhchhuah atanga za zela 92.20 te chu enkawl dam ni tawhin enkawllai 376 an la awm a, hri kai zingah mi 15 an boral tawh bawk a ni.