Thenzawl Dragon Fruit Growers & Marketing Society te hmalakna Agriculture Minister in a tlawh

Agriculture Minister C. Lalrinsanga chuan nimin khan Thenzawl Dragon Fruit Growers & Marketing Society member chhungkaw 59 leh mimal 3 ten Dragon Fruit an chinna hmun tlawhin an mamawhte chu theihtawpin a ngaihtuah sak dawn tih a hrilh.

Nimin-a Thenzawl khua a Dragon Fruit chinna hmun a tlawhna ah hian Dragon Fruit chingtute nen inkawmna neiin Agricutlure Minister chuan an thawmrimna ah lawmthu hrilhin an mamawhte chu theihtawpin a ngaihtuah sak dawn tih a hrilh a. Tuilak tur a awm phawt chuan a lo harsa deuh anih pawhin tihtheih ngei an tum tur thu a sawi a. “Hei leh chen hi rim takin in lo thawk tawh a, sawrkar chuan a umzui sak ngei ngei dawn cheu a ni. In hmalakna ropui tak ka hmuh hian inthlakthlengna ropui tak a thleng dawn niin ka hria. Hun harsate chu lo thleng thin mahse a rei ngai lova, mi tumruhte chuan an paltlang zel thin a ni tih i hrereng ang u,” tiin Dragon Fruit chingtute chu a fuih a ni. Huan thlai kan enkawl dante tunlai zawk leh mumal zawka kan kalpui chhoh zel a tul thu pawh sawiin Minisster chuan, kan sum lakluhte atanga kan thlai te enkawl letlehna lam kan uar deuh deuh a tul hle a ni, a ti a. Sawrkarin loneitute tana hmalakna lian tak tak an neih thu sawiin, kan mamawh em em leitha siamna din tum mek a nih thute, Bio-Pesticides siamchhuahna tur Bio-Control Laboratory te, thlai thar sawngbawlna lamte, Marketing mumal zawkte neih tumin hmalak mek a nih thu a tarlang bawk.

Thenzawl Dragon Fruits Growers & Marketing Society Secretary Lalruatsanga Pautu chuan he hunah hian an hmalakna te sawiin, an member te hi Mission for Integrated Development of Horticulture (MIDH) hmangin mi 11, FOCUS hmangin mi 28 leh SEDP atangin mi 20 te tanpui niin an vaiin mi 59 an ni a. Society dinin registration pawh an nei fel tawh a ni. An Dragon Fruits chinna hmun hi Sathlur tlang dung, tun hmaa Sialsuk leh Thenzawl inkar kawngpui hluiin a paltlang ramah niin a bul tan nan an member chhungkaw 59 ten Dragon Fruits ban 200 theuh leh mimal chhungkaw thum ten ban 200 theuh, a vaiin unit 62, dragon fruits ban 12000, kung 36000 an phun a ni. Zau panga (5) inhnaih tak si ah an inzarpharh a ni. Society member te hian ban 400 tal neih vek theih beiseiin sawrkarah dilna an thlen mek a, ban 400 chin hi chhungkaw chawmna leh eizawn nana tlinga ngaih a ni a. Ban pakhatah hian Dragon Fruits hi kung 3 zel an lawn tir a ni. Hei bakah hian Minister hnenah hian an hmunhma panna kawng chungchangte, tuilakna, Electric lakluh, beneficiary tihbelh leh a sawngbawlna lamte bakah an mamawh dangte an lo thlen a ni.

Sawrkar chuan MIDH, FOCUS leh SEDP atangte hian heng Society member tinte hi Cement ban 200 siamna tur Rs. 60,000/- theuh pein, Spayer te, leitha chi hrang hrangte, Kutkawr leh cutter te an pe tawh a. A panna kawng an thawh tawh chin pawh sanction tihchhuah tawh niin, tuilakna tha an neih theih nan Irrigation Survey tlangpui pawh neih a ni tawh a ni.

Comments

Popular News (Last 30 Days)

Vawiin-ah HSLC result

SDVA in hruaitu tur thlang