Deputy Speaker in hri hluarna Sialhau a tlawh

Tuikum bialtu MLA leh Assembly Deputy Speaker Er. Lalrin-awma chuan a bial chhunga hri in a tihbuai, Sialhau khua chu nimin khan tlawhin VLTF hruaitute nen inkawmna an neih bakah hri kai te enkawlna hmun a tlawh bawk.

Sialhau VLTF te nen an inkawmna ah Er. Lalrinawma chuan COVID-19 chuan ziaawm lam panin lang mahse mitinte kan fimkhur thiam zel a la pawimawh tih a sawi a. “Hri in min chiahpiahna hi a rei tawh a, hun pangngai angin hna thawh a kal tluang thei lo tih kan hre vek awm e. Amaherawh chu eng chen nge min la chamchilh zel dawn kan hriat siloh avangin kan nunphung tibuai lutuk lo zawnga khawsakpui thiam kan zir a ngai chho ta niin a lang,” tiin kan inkhuahkhirhna te pawh kan herrem thiam a tul chho zel tih a sawi bawk. Sialhau-ah hian hri kai enkawllai mi 5 awmin MLA hian Sialhau 4C chu a tlawh a, an mamawh tur bungrua te leh pawisafai Rs. 70,000/- chu MLA Fund atangin a pe bawk.

Assembly Deputy Speaker hian Sialhau Handloom Centre sak mek pawh a tlawh nghal a, Tuikum bial chhunga Puantah zirtu tam berna khua an nih avangin Handloom Centre chu an la chhawr tangkai hle dawna a hriat thu sawiin, Tuikum bial chhunga Puantah lama tui leh eizawn tumte tana hmalakna liantham tak kalpui tura ruahmanna siam mek a nih thu te a sawi a. Eizawnna nghet tha tak neih theihna a ni tih hre chunga theihtawp chhuah zel turin khawtlang mipuite chu a chah a ni. Sialhau Handloom Centre hi Ministry of Tribal Affairs atanga sum hmuh hmanga sak mek niin tunah hian hna tam zawk thawh zawh tawh a ni.