Latest News

Tualchhung Kohhran kutah ruaitheh dahin sawrkar in kaihhruaina tichhuak hma se an duh

COVID-19 hri leng avanga nikum lamah Kohhran hrang hrang kumdang anga Krismas lawmna an neih theihloh hnuah kumin ah inkhawm theih te a nih tawh avangin Kohhran hrang hrang ten Krismas leh Kumthar lawmna atana ruai theh leh theh loh chungchang chu tualchhung Kohhran kut-ah an dah hlawm a, hetihlai hian sawrkar in kaihhruaina ala siam loh avangin Kohhran thenkhat chuan inbuatsaihna ah harsatna an tawh thu an sawi thung.

Thuthar thehdarhtute zawhna chhangin Kohhran hrang hrang hruaitute chuan ruai theh chungchang hi tualchhung Kohhran kutah an dah tih an sawi vek a. Presbyterian Church of India-a Synod Moderator Rev. C.Lalhlira chuan ruai theh chungchangah Synod chuan thu leh hla neih a tum lo tih sawiin, “Ruai theh chungchang hi chu tualchhung Kohhran kutah kan dah a, tun dinhmunah chuan ruai theh tum an awm rualin tum lo pawh an awm a ni,” a ti a. Hetih rual hian Krismas ni takah erawh ruai hi theh loh nise tiin Tualchhung Kohhran te an hriattir tih a sawi thung.

Baptist Church of Mizoram-a AGS i/c Service Rev. R. Lalbiakliana pawhin ruai theh leh theh loh chungchangah engmah instruction siam lovin tualchhung Kohhran kutah an dah tih a sawi bawk a. “Kan hriat theih chinah chuan ruai theh tum chu kan Kohhran ah an la awm lova, hetihlai hian Kohhran thenkhat chuan sa sem tum an awm a, la ngaihtuah chiah lo te pawh an awm niin kan hria,” a ti bawk. Salvation Army, Territorial Financial Secretary, India Eastern Territory Maj. K.Vanlalsawmthanga chuan ruai theh chungchang chu tualchhung thuneihna ah an dah tih a sawi bawk a. “Headquarter lam atang chuan 'theh rawh u' tih emaw 'theh suh u' tih emaw engmah kan nei lo a. Tualchhung thuneihna ah kan dah tawp mai a ni,” a ti.

UPC of Mizoram hruaitu Rev. C.Lalremsanga pawhin Headquarters atangin ruai theh chungchangah engmah thu leh hla an nei lemlo tih a sawi a, “Ram pum ang chuan engmah ro kan neih ka ring lo a. Hmun thenkhatah hri ziaawm deuh an awm laiin ziaawm lo deuh an awm thei a, chuvangin inhrut-rual chi ah kan ngai lo,” a ti a. Seventhe Day Adventist Executive Secretary Rev. Lalnilawma Colney pawhin Krismas lawm leh ruai theh chungchang chu tualchhung thuneihna ah an dah niin a sawi bawk.

Hetihlai hian Serchhip-a Kohhran thenkhat te chuan ruai theh thei tura ruahmanna an siam laiin thenkhat erawh chuan sawrkar in hri leng inkaihhruaina thar ala siam loh avangin thutlukna mumal an la siam theiloh thu an sawi thung a. Hri leng in tihbuai lemloh Kohhran thenkhat chuan Krismas lawmna ruai hi siam tura ruahmanna an siam thu an sawi laiin Kohhran hruaitu thenkhat erawh chuan ruai siam tur hian inbuatsaihna tam tak kalpui a tul thu sawiin, hei vang hian sawrkar in ruai siam theih leh theih dawnloh chungchang hi tichiang vat thei se tha an tih thu an sawi bawk.

Comments

Popular News (Last 30 Days)