All India Cooperative Week vawi 68-na kharna nei

All India Cooperative Week vawi 68-na kharna inkhawm chu Inrinni khan Aizawl-a Dawrpui Multipurpose Hall-ah neih a ni.

Mizoram State Cooperative Union leh Cooperation Department buatsaih he Hapta kharna hun hi Cooperation Minister C. Lalrinsanga chuan hmanpuiin Cooperation Movement thil tum te, a innghahna lungphum leh a principle te chu a that em avangin Society te tan chauh ni lo, sawrkar, khawtlang leh Kohhran huangchhung thlengin a seng luh theih a ni tih a sawi a. “Mipui mimir ten hma kan sawn a, leirem kan rah a, dinhmun tha zawk kan chan theihna tur atan he movement hi din a ni,” a ti bawk. He hunah hian MSCU-a hruaitu lo ni tawh thin Lalbiakthanga Pachuau, tunhnaia India President hnen atanga Civil mite chawimawina sang Padma Shri Award dawngtu chu lawmpuina hun hman a ni bawk.