COVID dam tawh zingah Virus in an taksa a harsatna a siam engemaw zat hmuh an ni tawh

Tunhnaiah COVID vei dam tawh nia inhria, he virus in an taksa a harsatna a siam engemawzat damdawi Inah an hmuh tawh thu Civil Hospital Aizawl-a Medicine Specialist Dr. J. Lalramchhuanga chuan a sawi.

State-Level Expert Committee on COVID-19 Management-a Member ni bawk Dr. J. Lalramchhunga chuan COVID-19 hri kai negative tawh, kar 4 emaw a aia rei insawiselna neite chu Long COVID-Post-COVID Syndrome tia sawi a nih thu sawiin, COVID vei hnu hian chauh ngawih ngawih, thawhah, rilru phawklek hma (anxiety) vei zui a awm theih a, hei vang hian kan fimkhur a ngai em em a ni, a ti a. “A theih hram chuan taksa tana tha ei leh in tur a ni a, mut kan kham tha tawk tur niin tuisik tam tawk in thin a pawimawh a ni,” a ti a. Heng bakah hian COVID Appropriate Behaviour - Mask vuah that, Kut silfai uluk leh midang nen inkar hlata awm kha chhunzawm zel tur a ni tih a sawi bawk.

Hnathawh chungchangah pawh COVID-19 vei te chu an dam atanga kar khat chhung tal hi chu la chawlh hahdam a that thu a sawi a, taksa sawizawi a pawimawh rualin sawizawi dan tawk kan thiam a tul thu sawiin, “Zangkhai zawka insawizawi a pawimawh a, ke a kalte leh inchhung sekrek khawihte a hahdam tawka tih hi insawizawina atana tawk em em a ni,” tiin COVID-19 hri kai dam tawhte pawh engemaw chen fimkhur taka mahni inchik a la ngai tih a sawi a ni.

Hri darh thutna awm theihna (outbreak) a la hniam loh thu sawiin Dr. Chhuanga chuan, “Europe leh Asia khawchhak lamah chuan hri kai an pun thar avangin inkharkhipte an kalpui leh tan tawh a, keini hi wave dawng tlai kan nih thin avangin kan lo tawnhriat tawh atanga kan in zir fin a kan fimkhur lawk thiam hle a tul a ni,” a ti a. Hnathawhhona hmun, zirna In leh sawrkar pisa hrang hrang bakah mipui punkhawmna hmunah te COVID-19 laka invenna ruahman that a tul thu leh vantlang mipuite pawhin kan himna tur a ni tih hriaa kan zawm that a pawimawh thu a sawi bawk.

Dr. J. Lalramchhunga chuan khawpui lamah hri inkaidarh hi a ziaawm hret hreta a lan laiin thingtlang lamah chuan a pung veleh thut thin a, hunpui lo thleng turah thingtlang atangin khawpui ah chakkhai lam turin kan kal nasal leh dawn a, hetih hun lai hi kan fimkhur zual hle a tul hun lai a ni, a ti a. Inenkawlna leh damdawi In lam thawktute awm hlatna khua ah te hri kai an pun hian a thlaphanawm lehzual thin avangin khawpuia chakkhai lam thinte pawh fimkhur taka awm a, mahni khaw lama hri pu darhtu ni lo tura theihtawpa kan fimkhur a ngaih thu a sawi a, “Hripui hian mi zawng zawng min hrut rual avangin duhthlan tur dang kan nei lova, kan zavaia inlungruala kan beih tlan a ngai a ni,” a ti bawk.