International Day of Person with Disabilities pualin Serchhip-ah hun hman a ni

Nimin Dec. 3, 2019 khan Serchhip-ah Zoram Entu Pawl (ZEP) leh Serchhip ICDS Project tangkawp buatsaihin 'International Day of Person with Disabilities' hman a ni a, Serchhip-a pianphunga rualbanlote leh anmahni enkawlna kawnga thawktu thahnem tak an tel.

St. John the Baptist Hall, Serchhip P&E Veng-a 'International Day of Person with Disabilities' puala hun hman hi Samagra Shiksha Abhiyan Serchhip District-a Dy. DPC (S), PC. Vanlalluna chuan khuallian nia hmanpuiin khawvel puma pianphunga rualbanlote Ni chu kum 1992 atanga hman a nih thu sawiin, Pathian in a thil siam te chu tha a tih avang leh Pathian siam kan nih avangin kan nihna leh dinhmun ah vui tur kan nih loh thu sawiin, siamtu min siam dan lawm taka kan pawm thiam a tul thu a sawi a. Taksa leh hriatna lama harsatna nei te chu rualbanlo ni lovin taksa fu-ke kim, hriatna hrang hranga harsatna nei si lo, amaherawh chu mahni ni tur ang ni phak si lo te chu rualbanlo an ni zawk tih a sawi bawk.
Nimin a he hun hman hi Serchhip ICDS Project-a CDPO, Lalbiakliana pawhin hmanpuiin hetiang ni pawimawh ZEP te hmalakna a Serchhip-a hman a ni chu lawmawm a tih thu a sawi a. Serchhip District-ah Social Welfare Department a awm mumalloh laia an hmalakna tur kawng hrang hranga hma lo latu ZEP kan nei chu lawmawm a tih thu sawiin, khawvel hian pianphunga danglam bikna nei te hi a ngai pawimawh hle tih a sawi a. Kum 1983 atang tawh khan khawvel pumah hma lo lak a nih tawh thu leh India ramah pawh nasa taka hmalak a nih thu te, 'Rights of Person with Disabilities Act 2016' te siamin a Rules te pawh siam a nih tawh thu te, pianphunga danglam bikna chu engtik hunah pawh keimahni leh kan chhungte ah thleng thei reng a nih thu te pawh a sawi bawk.
Zoram Entu Pawl (ZEP) hian Community Based Rehabilitation (CBR) Project hnuaiah hian rualbanlote hmasawnna tura kawng hrang hranga hma la in he Project hi Serchhip District chhunga khaw 15 ah kalpui mek a ni a, he Project hi Coordinator pakhat leh CBR Workers 4 kaihhruaina hnuaiah kalpui niin kumin September thla thleng khan rualbanlo mi 370 ziahluh ni tawhin heng mi ten hma an sawn theihna atan hian kawng hrang hrang chi 5-ah hmalak thin a ni a. ZEP hmalakna hnuaiah hian rualbanlote hriselna enfiah hna kalpui thin ah mi 230 te chu Disable Certificate pek an nih tawh bakah mi 190 te hnenah bungrua leh hmanrua an mamawh chi hrang hrang te sem a ni tawh bawk a ni.
Nimin a 'International Day of Person with Disabilities' ah hian Thupui atan 'Promoting the participation of Person with Disabilities and their leadership' tih hman a ni a, kum kalta a an en-kawlna hnuaia awm PwD boral mi 3 te sunna hun hmangin chawhnu lamah 'Rights of Person with Disabilities Act 2019' zirhona neih a nih bakah item chi hrang hrang entirin nileng-in hun an hmang a ni.

Comments

Chhiar Hlawhte