Deputy Chief Minister in cheng nuai 2418 senga sak ‘Lena Sports Stadium’ a hawng

Ministry of Housing and Urban Affairs kaltlanga cheng nuai 2418 senga sak Lena Sports Stadium, Lunglei chu nimin khan UD&PA Department changtu Deputy Chief Minister, Tawnluia chuan a hawng.
Lena Sports Stadium hawnna hunah hian Deputy Chief Minister chuan Sports Stadium changtlung tak Lunglei in a neih theihna tura hun leh tha leh ngaihtuahna seng tu zawng zawng te chungah lawmthu sawiin, neitu rilru pu chunga duat taka enkawl zui turin mipuite a chah a. Infiammi te hmakhua ngaiin sawrkarin nasa takin hmalak chhunzawm zel a tum thu sawiin, Sports lama inkaihhruaina mumal tak, Mizoram Sports Policy 2019 pawh neih tawh niin Sports kaihhnawih hmasawnna ruhrel te pawh a tul anga ruahman chhunzawm zel a ni ang, a ti a. Sawrkar leh Private company hna te Mizoramin kan indaih tawhlo avangin Mizo thalaite hnathawh tur hrelo leh changlo an tam hle tih pawh Deputy Chief Minister chuan sawiin, hengte hian an thiamna (skills) leh an tui zawng (interest) hmangin eizawnna kawng an dap a tul thu leh khawvel changkang chho zelah Entrepreneurship leh infiamna te hi thalaite tan eizawnna a tlin tawh thu a sawi bawk.
He hunah hian khual zahawm Agriculture Minister, C. Lalrinsanga pawhin Mizote a hnam anga kan lansarh chhoh ve na chu Games and Sports lamah a nih thu leh thalaiten eizawnna ngelnghet an neih theih bakah kan hnam tih hmingthatna kawng pawimawh tak pakhat a nih thu a sawi a. Sports Minister Robert Romawia Royte pawhin Mizoramin infiamna hmunhma te kan indaihloh hle laiin Sports Stadium changtlung tak peihfel a ni leh ta chu mipuite, a bik takin infiammi te tan malsawmna ropui tak a nih thu a sawi a. HPC Vice Chairman Lawmawma Tochhawng pawhin Lena Sports Stadium hawn a ni chu Lunglei District tan ni chhinchhiah tlak tak leh hmasawnna mellung pawimawh tak a nih thu a sawi bawk.
Lena Sports Stadium hi Sawrkar laipui Ministry of Urban Development (2017 kum atanga Ministry of Housing and Urban Affairs tiha koh) kaltlanga cheng nuai 2418 senga sak a ni a. Project hi MoUD 10% Lumpsum Scheme for NE States kaltlangin September 24, 2009 khan sanction a ni a. Project hi May 16, 2014-ah tan niin October 30, 2019-ah zawhfel a ni. He Stadium-ah hian Football Field 90x60 metre a zau Artificial Turf phah leh 8 Lane Synthetic Running track a awm a. Mi 1000 lenna Public Gallery leh mi 500 lenna VIP Gallery bakha VIP Room, Press Room, Parking, Public Toilet, Ticket Counter leh Guard Room, Stadium tih enna Compound lighting, Dressing Room, Fencing, Tui Supply, Drainage leh a panna kawng laih te he project ah hian a tel a ni.

Comments

Chhiar Hlawhte